Tekopp

Eg skreiv vel om tekoppar i sommar også, då eg "plutseleg" hadde teservise til 18 stykker. Eg har vore innom Fretex nokre gonger etterpå for å sjå om det har dukka opp nye deler til dei koppane eg har. Eg har funne eit kakefat, og eg fann 8 asjettar til "det rifla" ein dag.

Men Fretex har mange skattar...og eg fann altså denne koppen ein dag!

20 kroner. Eit kupp. Det var berre ein kopp, utan fat under, men den var så fin, så den fekk bli med heim.
Eg har drukke te fleire gonger av denne, til sakte frukost med te frå kanne og aviser og radioen på P2 og ein kjeks til dessert.

Koppen har fint stempel under, og er frå Arabia. Det står også "38", så eg lurer på om den kan vere frå 1938? Det stemmer iallfall at stempelet er frå den perioden.
Eg hevar meg over dei som meiner eg har nok koppar. Så mykje glede for 20 kroner!


(og til mitt forsvar: Eg kjøpte ikkje to rålekre tekanner! Den eine i turkis og gull...kjenner eg angrar litt, men eg treng verkeleg ikkje fleire tekanner. Men står den der neste gong eg er innom, kven veit?)

Blåbær, bringebær, jordbær, multer, rips...

Dei som har lese bloggen over tid, veit at eg har eit velutvikla hamstergen! Sjå feks her Urkvinnen og her. Eg likar å samle. På hausten gjeld det særleg bær! (elllers i året handlar det om sko, kjoler og teserviser...)

Eg hadde oppteljing i går, og fann ut at no har eg jordbærsyltetøy (eg har sjølv plukka bæra i butikk) bringebærsyltetøy (eg har kjøpt bær direkte frå bonden) multesyltetøy (eg har plukka sjølv! Både i Estenstadmarka og i Trollheimen) blåbær (plukka sjøl i marka) og ripssyltetøy og ripsgele (plukka sjølv hos ei venninne med meir bær enn ho trong)
Vi har ete jordbær med fløte, rips med vaniljesaus og blåbær med vaniljesaus. Eg er eit dessertmenneske!

Mindfullness i skogen!

Vi bør kunne møte vinteren ganske trygge på å ha nok syltetøy og antioksidanter tilgjengeleg.

Men det er noko med bær, som er meir enn at det er fint å finne igjen. Det er godt å plukke! Eg kosar meg når eg får gå i skogen å plukke (bringebær og jordbær høyrer med, sjølv om eg kjøper) Å gå i skogen, rusle, plukke litt her og der, fylle bøttene, kjenne lukta av lyngen. Kanskje bli litt våt når ein går over myrene. Gleda over å finne ein ny stad med bær. I år fann eg ei multemyr den ingen andre hadde vore før, og då eg kom tilbake etter ei veke, hadde ingen vore der etter meg. Eg ser mange multegleder i åra framover på den myra! (Grunnen til at eg fann den, var at eg skulle prøve om det var ein snarveg mellom to stiar. Det kan vi vel slå fast at det ikkje var, sjølv om eg fann fram! Og tilbake igjen.)

Og medan enkelte likar å plukke bær,,
samlar andre på gode fotomotiv!

Matbua full av gleder!

I tillegg veit eg no at september og ny elgjakt nærmar seg, så det står elgkjøt på menyen annakvar dag. For vi må lage plass i frysaren til evt elg spm blir jakta i år!

Og om litt er det klart for tyttebær! Eg gler meg!

Kjærleik

Heime hos oss deler vi på oppgåvene. Eg er ansvarleg for bekymringar, der er eg ansvarsfull og tek oppgåva på det største alvor. Særleg nattestid. Til no har eg hatt ansvar for å levere og hente bil på verkstad, og det har til tider ikkje vore nokon liten jobb. Tenkjer dei på verkstaden blir glade når dei oppdagar at eg skiftar jobb, og difor ikkje skal ha den oppgåva lenger. Eg kan vere litt hissig når det kjem til bil som treng reparasjon... Og eg er husets hamster. Eg har eit velutvikla hamstergen. Eg finn stadig ting vi/eg  treng, enten det no er sko, klær, mat, bøker eller andre ting. Ein sjeldan gong av og til viser det seg at dette trong vi vel eigentleg ikkje.
Mannen har ansvar for ein del andre ting, båten, halde igjen litt når hamsteren slår til, fotoutstyr etc.

Mitt siste tilfelle av hamster gjeld teservise, som eg oppdaga at vi ikkje hadde. Vi hadde iallfall ikkje akkurat det eg syns eg trong. Og eg fann jo tekoppar, hos Fretex. Men så hadde eg berre koppar og tefat, ikkje asjetter... Og korleis skal ein kunne ete sandwichar eller scones med lemon curd, krem og syltetøy utan asjett?? (Nokre vil vel seie at eg kan bruke andre asjetter, men...)

Spire,
både tefat og asjetter

Det riflede, kun tefat...

Ut på jakt igjen! Det går an å søke på Finn.no. Eg søkte på Finn.no, eg fann på Finn.no. Rett nok litt meir enn eg skulle ha. Eg skulle ha asjetter, det fekk eg. 7 stykker. Det var også med 7 tekoppar og tefat. Og eit serveringsfat. Eg avtala henting, og tenkte at når det først var i hus, så var det i hus.
Problemet var at eg hadde vorte forkjøla, eg hadde ei form som var heilt topp til å ligge på sofaen, med Ibux innabords kunne eg orke å sitte også. Eg tenkte at dette måtte eg berre la gå, eg orka ikkje kjøre 3 mil for å hente. Men mannen tilbydde seg å kjøre meg! Tross lite skapplass og eit ikkje like klart behov for fleire tekoppar, forsto han at dette var noko eg ønska meg. Eg hadde kanskje vore litt uklar på kor mykje eg skulle kjøpe...

Te frå Sverige bli betre i fin kopp!
Og med ingefærkjeks frå Sverige, servert frå
Mummihus kjøpt i Japan.

Så no har vi 10 tekoppar og 7 asjetter i "Spire", og 8 tekoppar i mønsteret "det riflede". Du forstår problemet? Eg har ikkje asjettar til "det riflede"!
Eg er på saken, eg har søk på Finn.no etter asjetter til "det riflede" frå Porsgrund. Og i morgon skal eg ein tur på Fretex for å sjå kva dei har!

Heldigvis syns faktisk mannen at eg har valgt eit to fine og elegante serviser, og han kjører meg nok når eg får tak i neste funn også! Tross fulle skap frå før. Eg trur det er dette som er kjærleik!

Det spørs forresten om eg snart skal  må invitere til eit teselskap. Det står ikkje på koppar!

Julehamster

Igår var det start på julematlaging. Det er jo koseleg arbeid.

Men det er andre ting som er kjekt også! Eg er ein hamster! Eg er tradisjonsmenneske, eg likar å ta fram julekoppane min når det blir jul, eg må ha det samme fatet å legge lefser på og eg drikk jule-te.

Og her kjem hamstring inn i bildet. Eg har allereie tre sortar jule-te i hus, Jada! Eg har kjøpt adventskalender.

Og eg har nye novemberkoppar. Eg kallar dei novemberkoppar, eller vinterkrus, alt ettersom. Eg fann 5 stykker på salg etter sist jul. Store, rause krus. Raude, med fint mønster. Taiga-krus frå iitala. Så klart eg ikkje trong dei! Dei vart lagt i ei kasse i kjellaren, og så håpa eg at ingen skulle legge merke til at vi hadde fått nye koppar. Det var litt mykje å håpe på, kan du seie. Og no fann eg nettopp eit sjette krus, på salg. Så klart  5 6 krus er passe. Iallfall om eg ryddar bittelitt i skapet.

 Minimalisme er visst ikkje mi greie!

Men jule-te i nye krus, det er fint det! Og grovt brød med appelsinmarmelade og ei pepparkake til "dessert". På eit fat eg ikkje veit kvar kjem frå.

(Og eg har ikkje sagt noko om det andre juleserviset eg har byrja samle på. Det ligg i kjellaren enno, men skal fram i løpet av desember. Eg må berre rydde litt i skapet på kjøkkenet, som sagt)

Urkvinnen

Min indre hamster elskar hausten! Det er nok urkvinna i meg som slår til, og tenkjer at vi må hauste medan det er noko  å hauste. Før i tida var det lite REMA og Kiwi å få hjelp hos utpå vinteren (det er litt dumt at ho ikkje ser forskjell på nyttig og mindre nyttig, det er lett å få tak i klær på vinteren no for tida. Og serviettar, blomstervaser etc, det blir ikkje brukt opp på same måten som bær og annan mat)

Idag har eg vore på blåbærtur, fann ein knaus med masse bær. Måtte gje meg då alt eg hadde tatt med for å plukke i var fullt. Regnet kom ikkje før eg var nesten ferdig å plukke og det var stille og fredeleg, det er fordelen med å gå langt inn i skogen før ein startar å plukke (men det er litt skummelt å gå alle bakkane ned igjen, for tenk om eg snublar? Heldigvis har bøtta lokk og eg heldt meg på beina!) Eg møtte nokre få andre som var ute i same ærend, og då snakkar vi litt om bærhausten og i vage ordelag om kvar vi har vore "Joda, det er masse bær, når du går innover. Litt sånn bak der, kanskje det er bær der? Eg var ikkje der altså, men meir over slik" Det går eit skille i skogen på kvar du byrjar å prate med dei du treffer, ikkje berre nikkar og mumlar hei. Det er heilt fasinerande, for etter ei flate og opp ein bakke, så snakkar alle. "Vått på myra idag", eller "lite folk ute, endå sola skin" og "du skal på bærtur, ja?"

Vel heime fekk eg hjelp til å renske og no har eg sylta over 2 kg bær. Det blir fint å ha til vinteren! (men urkvinna veit det er meir der ute...og lurer på når ho kan ta ein tur til) Frysaren er snart full av bær, for vi har sylta jordbær og bringebær tidlegare i sommar, og eg har fått lovnad på å plukke rips. Snart er det tytebær også, og det er noko av det kjekkaste å plukke.

Til dessert hadde vi blåbær og vaniljesaus. På blåbær skal det være raust med sukker, og vaniljesaus. Det er smaken av seinsommar og sjølvplukka bær og litt mørkare kveldar på hytta. Vaniljesaus vart laga av sausepulver og tørrmjølk, for på hytta var det rasjonering på mjølka, det var langt og tungt å bære, men vaniljesauspulver og tørrmjølk kunne fraktast fram på snøscoter på vinteren og brukast utover sommaren. Kanskje var det stekt fjellfisk til middag også, med potet, gulrot og rømme, akkurat slik det skulle vere ein laurdag på hytta? For garnfisket er betre når nettene blir mørkare, det veit alle.

Det er rart kva ei skål blåbær kan få fram av minner.

Fridag

Eg skulle berre ein liten tur i skogen. Tok med nokre boksar i tilfelle bær (inni meg tenkte eg store mengder blåbær) Tok med litt mat og vatn i tilfelle turen vart litt lenger.
Turen vart litt lenger, eg kunne hatt med meir mat. (Heldigvis finns det butikkar  som sel boller på heimvegen.)  Nokon hadde vore før meg og plukka masse blåbær,  men eg veit om fleire stader med bær,  og skal nok ut igjen. Eg fann bær, altså, den var berre ikkje der eg hadde tenkt. Eg fann litt bringebær. Det er mengder med tytebær, eg skal ut igjen!
Eg åt maten min ved eit stille vatn, eg var ute timevis,  eg kosa meg. Og vart sliten, sjøl om eg ikkje gjekk så fort.

Og alle andre planer for fridagen utgjekk! Klesvask er det forresten mindre av etter at ungane flytta ut.

Og i morgon er det september...

Vekestart, ferieavslutning og liste for neste veke

Det er søndag i heimen, vi har hatt grillmiddag med både storfemørbrad og lammekotelettar med bakte potetbåtar og grønsaker. Og dessert, det er det ikkje ofte vi har. Men når eg har plukka bittelitt ganske modne blåbær i skogen er det berre å nyte med vaniljeis.

Det er søndag, og eg går inn i siste ferieveke. Mannen startar på jobb i morgon, ein junior skal jobbe litt denne veka, men eg har fri! Planene er litt uklare, men eg skal nyte at det er fri, eg skal nyte tekoppar og avis til frukost, radio, at eg har lite avtalar og kan la humla suse!

I mangel av humle, får denne sommarfuglen
gjere nytta!

• tekopp og avis, late morgonar
• vaskemaskin og restar av skitne klær frå båtturen. Satsar på klestrøk ute, og at eg finn golvet på vaskerommet snart. Det er akkurat no dekt av 3 dyner og nokre sengesett...
• innkjøp til junior #1 og #2. Etter planen flyttar begge ut i løpet av nokre få veker, det trengs sengesett, handklær, koppar og kar, kanskje ei seng til den eine, og eit skrivebord?
• tur i skogen. Kanskje finn eg meir multer? Igår gjekk eg meg på ei myr eg ikkje viste om, og der fann eg gull! Men det er iallfall blåbær i skogen, og om nokre dagar er den meir moden og klar for plukking. Mannen fann sopp idag, og kanskje kjem det kantarell snart?!
• sylte bringebær. Trur eg må satse på hjelp av butikken til plukking, det er lenge til det er full sesong i marka. Min indre hamster frydar seg over alt som er å plukke og sanke, eg har god plass i frysaren enno.
• eg skal lese. Eg hadde jo så mange bøker klar til båtturen og ferien, og det meste er ikkje lese enno.
• blogging. Ferien hadde som ei slags overskrift "ut av komfortsona", og eg har ikkje berre vore på båttur! Eg har gjort noko som var mykje meir utfordrande! Meir kjem etterkvart.
• blir det sol, skal eg jobbe meir med brunfargen og fylle opp lageret med D-vitamin så godt eg klarer!
• eg skal prøve finne ut kva eg har brukt pengar på i sommar. Eg mista litt kontrollen då det vart oppdaga svindelforsøk på lønnskontoen og kortet vart sperra... Men no har eg nytt kort, og alt er i orden!
• treffe fine folk! Vi er mellom anna inviterte på middag ein dag, og kanskje rekk vi fleire slike treff?
• ambisjonar om å rydde i klær. Vi får sjå kva det blir til!
• bake brød eller bollar, eg bakte bollar her ein dag, og det var tydelegvis ikkje familien vant til, for eg fekk så mange godord!

August, mørkare kveldar, vi går mot skulestart og ferien er snart over. Rutinene kjem meir og meir tilbake, det er slutt på seine kveldar og impulsive turar. Men det er jo godt med dei faste rutinene, dei gode vanene og kvardagaen også. Kanskje er det lukke?

Lukko

Lukko, hu kan no vera sjelden,

hu.

Men av og te når hu kjeme tuslande

te meg på sokkaleisten, ein sånn

heilt alminnelege dag, så seie eg da

no òg:

Har du kanskje vore her heila tido,

du? 

Oskar Stein Bjørlykke

Ein kjolemonolog. Vedkjenning frå eit klesskap

Eg likar sko. Det er ikkje hemmeleg.
Men eg er svak for kjolar også! Veldig svak... Eg kikka litt etter idag, og nei, du får ikkje noko tal, men det er kjolar for fleire anledningar på stativet mitt! Og eg meiner, ein veit aldri kva ein treng! Eller når...

Stativet er fullt, men mannen  har skjortene sine der også. (sa ho, for å unnskylde seg litt...)
Kjole er eit kjekt plagg, det passar godt på fest, i selskap eller i sofaen ein laurdagskveld. Det er behageleg å ha på ein varm sommardag, og det er varmt og lunt med ein ullkjole på vinteren. Eg kjenner meg fin med kjole på, og det er jo fint! Det kan vere kjolen som reddar ein trist marsdag eller ein kald junidag.
(Skjørt gjer same nytte, men dei får du ikkje sjå idag) Når eg ser bildet, lurer eg litt på om eg ikkje manglar noko i grønt og/eller gult? Eg har heller ingen lange kjolar. Det var jo den absolutte toppen av lukke som barn: sidkjole! Eg har hatt "huset-på-prærien"-inspirert, eg har hatt blomstra og einsfarga. Men no? Ingen!

Her kjem nokre nærglimt av ulike skattar:

Raude kjolar av ulik type.

Denne kjolen er indisk.

 Grønn fløyel. Er alltid litt usikker på denne, er den fin eller ser eg ut som ein sofa frå 70-talet?

 Perlebroderi for dei store anledningar!

 Maritime striper for båtlivet!

 Eg har sko som passar til alt!

 Eg har visst ei eiga avdeling for blå linkjolar... Verdt å huske, eg treng linkjolar i andre farger!

"Den lille sorte" med variasjoner og vener!

Ein i rosa fløyel med glamourfaktor og ein for varme somardagar.

Og det er alltid plass til ein til, eller la oss seie to?

Mi indre hurpe

Vanlegvis har eg god kontroll på mi indre hurpe, men idag stakk ho seg fram ein tur.

Eg skulle handle mat++ idag, og stakk innom ein av dei mange butikkane i nærområdet. (Eg er litt bortkjemt, trur vi har 9 matbutikkar innan ein gangavstand på 15 min) Eg har enkelte favorittar, og andre som står lenger ned på lista. Av ulike grunnar tok eg idag turen innom ein eg vanlegvis ikkje brukar. Det skulle dei sikkert ønskje at eg ikkje gjorde. Eg også, iallfall undervegs.

På min runde rundt i butikken, fann eg den hylla snart alle butikkar har no, og som eg likar aller best: den med varer som snart går ut på dato, og som har nedsatt pris. Eg blir så glad av slike hyller! (min indre hamster blomstrar opp!) Eg finn ting eg kanskje ikkje hadde kjøpt ellers, men no prøvar ut. Det blir mindre mat som blir kasta, og eg må jo tilstå at eg likar ting som er billege! Så eg kikka over kva som var der, og fann noko som passar perfekt til middag i morgon og yoghurt som er supert som mellommat. Så fann eg det som sto på lista og gjekk til kassa.

Eg legg varene på båndet og følgjer slik halvvegs med. "Denne varen går snart ut på dato", seier ho i kassa. Ja, sa eg, og tenkte at det forsto jo eg også sidan den er merka med "kort holdbarhet, men like god, minus 40 %". Så kikkar eg på summen, og tenkjer at dette vart då veldig dyrt. "Desse varene er nedprisa", seier eg. "Nei", seier ho i kassa. Jammen, dei er jo nedprisa, seier eg. "Nei", seier ho i kassa. Jammen, dei er jo merka med minus 40%?! prøvar eg meg. "Nei", seier ho i kassa. Jo, seier eg, og viser henne lappen på varene.

"Den slags lapp har eg aldri sett før", seier ho. Den må jo bety at varen er nedprisa? meinte eg "Nei", seier ho i kassa. "det står det er kort holdbarhet". Jammen, og det er no hurpa ikkje er så veldig indre lenger, er det kaloriinnhaldet som er 40% lavare då?! (eg ser at det var umodent og dumt, men eg var litt lei) No var køa bak meg ganske lang også, og ho fekk tak i ein kollega som kunne forklare at minus 40% betyr at varen er nedprisa, ho i kassa var framleis sterkt i tvil... Køa voks endå lenger bak meg, for no vart det kortkurs i scanning og retting av prisar. Eg fekk varene til tilbodspris, ho i kassa lærte noko nytt og ho unnskyldte seg etterpå, så mi indre hurpe roa seg ned igjen.

Eg gjekk heim og åt yoghurt. I morgon skal vi ha grov kokemorrpølse til middag. Dame (48) er tross alt fornøgd. Satsar på at mi indre hurpe ikkje treng vise seg på ei stund.

Difor bør du alltid ha ei lue i sekken!

Idag gjekk eg tur i marka. Eg hadde med pose for å kunne plukke litt tyttebær, for den er moden no. Store, raude bær som ropar etter å bli trollkrem eller rørte bær å ete til søndagssteika i vinter. Men eg fann bringbær og blåbær også, som gjekk rett i munnen. Nam! Så mykje bær og så lite tid til å plukke...

Eg gjekk lenger enn på lenge, eg gjekk der vi er så få som går at alle ein treffer stoppar for å snakke litt om kor fint det er i skogen, kor mykje bær det er igjen og kor varmt det er, no når vi er langt ut i september!

Så gjekk eg litt til. Og kva ser eg!? Heilt plutseleg der inne i skogen?! Nede i lyngen og mosen. Rett ved stien:

Små gullgule...

Kantarell!

Skogens gull: kantareller! Min indre hamster vart overlukkeleg!
Men kva hadde eg å plukke i? Ingen ting... Plastpose er ikkje noko for sopp. Ned i sekken og håpe at det skulle vere ei soppkurv der. Nei, og ingen papirpose, men ei rein lue hadde eg! Eg plukka forsiktig dei små og og gule og la dei i lua!
Ei lue kan altså vere redninga, sjølv om det ikkje er surt og kaldt!

Dagens fangst!
(og det var jo fin fargematch mellom lue og kantarell)

Dagens moral: Gå aldri på tur utan lue!

Vekestart veke 34

August, altså. 

I tillegg til at det er min bursdagsmånad, er det også månaden for nytt semester, bærplukking og kveldar der det er på tide med levande lys og (iallfall no) flotte solnedgangar. Ein slags festmånad spør du meg! 

Ein kveld denne veka var eg nesten tilbake på kjøkkenet heime, slik eg huskar augustkveldar då eg var lita. Ein slik kveld, rett etter skulestart, når det byrja bli mørkt ute. Det var nyplukka rips og vaniljesaus, på omnen sto ein kjele og putra med rips som skulle bli ripsgele. Lukta av varm ripssaft fylte heile kjøkkenet! Akkurat som då eg var lita. Men heldigvis utan bøker som skulle ha nytt bokbre og irriterte og oppgitte sukk over kor vanskeleg det var. Tape som klistra seg feil, og papir som krølla seg og ikkje var stort nok likevel.

Dette bildet skulle vore med lukt!

Mange små glas med ripsgele!

Elles har veke innehalde jobb, som vanleg. Men det har vore mykje anna bra også!

Tur i skogen etter både blåbær og bringebær. Og snart er tytebæra moden. Lukke! Min indre hamster lever livets glade dager no, med så mykje å sanke i skogen(eg skulle berre hatt litt betre tid og ein betre rygg). Eg har gått tur med ei venninne, berre for turen sin del. 

Ryggtrening. Eg prøvar trene målbevist, og leitar etter resultat, men det går sakte. Det får ikkje akkurat fram treningsglede å sove dårleg pga vond rygg.

Kafeliv med ei anna venninne, med fokus på den gode samtalen og løysing av verdsproblem av ulik storleik. Vi kom ikkje heilt i mål, og må nok ha ein kveld eller to til.

Det har vore sol og varmt, og eg har fyllt på D-vitaminlageret i kroppen, slik at eg har litt å gå på til vinteren.

Når det byrjar bli mørkt, må ein ha fyrlys, særleg når ein er i båt (eg får fletta inn litt båt i dei fleste innlegg for tida :) )

Kalypso

Åse-Marie Nesse

Eg tenner eit fyrlys for alle som elskar
for dei som ror i ring og aldri finn same rytmen
for dei som berre lyder til signal
frå framande farty
for dei som støytte på grunn i medvind
for dei som styrer etter stive sjøkart
utan å ense måkars mjuke flog
for alle som kjenner dei sju hav
og aldri lodda djupa i sitt eige hjarta

eg tenner eit fyrlys
for all villfaren kjærleik
så vegen til det lova landet
blir synleg i natt

Ønskjer deg ei god veke!

Blåbærskogen

Det er blåbær i skogen, i mengder! Den er akkurt vorte moden, så det er mange fine turar og god smak å glede seg til. Eg har bestemt at i år skal eg berre ha med små bøtter å plukke i, slik at eg ikkje overdriv for ryggen. Det får heller bli fleire turar!
Min indre hamster blir veldig ivrig med tanken på at det er massevis der ute som kan plukkast og syktast og leggast i frysaren! Eg har allereie jordbær og bringebær på plass, i fint merka beger. (men den er ikkje meir sjølvplukka enn på butikken)

 

Det er ikkje så dumt å ta seg tid til å sjå dei små detaljane når ein er ute på tur, som denne fine sommarfuglen midt i blomsterenga.

 

Her er dagens fangst, ca 1/2 liter blåbær. Berre tenkt deg lukta av skog og blåbær..

Vurderte å putte bæra i frysaren...men...

Eg vurderte å fryse ned bæra og ha til vinteren, men

...det var syltetøy istadenfor. Ikkje så dumt, sjølv om den er historie no. Blåbærsyltetøy på brødskiva er godt, for ikkje å snakke om blanda med yoghurt naturell.

Og eg rakk heim før regnet kom! Og det kom kraftig...

Vekestart veke 6

Når noko skal inn i huset, må noko anna ut. Det er tanken iallfall, men lett å gløyme. Hamstergenet er velutvikla og har med åra vokse seg sterkt.
Eg har kjøpt ein stor ting(kanskje avslører eg kva det er ved seinare høve) og då må noko ut. Mannen var ikkje i tvil om kvar tingen skulle stå. Eg var meir i tvil. Rommet der vi legg alt som er til overs, som skal tenkast litt på før det evt skal kastast, bokkasser som skal til Fretex, klær som skal strykast(har ein merkeleg tendens til å ligge der lenge) Jaktklær og jaktutstyr, turklær og klatretau. Hyller fulle av kasser med delvis ukjent innhald, veskene mine, ein tripptrappstol i tilfelle vi får besøk av nokre små vener, bøker som venter på bokhylleplass og diverse tidsskrift. Og ein hybelkaninfarm, mellom anna.
Altså, kvar skal ein starte? Vi kasta det som det ikkje var tvil om. Samla tidsskift i kasser. Bretta saman turklær, såg over strykeklær, fanga hybelkaninane.
Eg fann ei kasse med papir. Slike ein ikkje berre kastar. Sjukmelding frå 2001. Ryggen var dårleg då også. Lønnsmeldingar frå 1999(tente eg så lite det året?) Teikningar frå ungane. Ei ønskjeliste til 6årsdagen til eldstemann(spidermandrakt og radiostyrt motorsykkel) Korrespondanse med Trygdekontoret, heller ikkje nytt. Innkalling til operasjon i 2004. Diverse avisutklipp. Klistremerker og strikkepinnar på heilt feil plass. Og der var skatten, ein skjebnes ironi ein dag ein ryddar og klagar over rotet sitt:

Eit avisutklipp frå 2008, med tittelen "Bli kvitt rotet". jada... det synes ikkje å ha virka å ha det liggande, så no er det i papirsøpla! Saman med ei mengde kvitteringar frå ca 2006 for klær til ungane og meg sjølv.
Og på ein slik sjølvransakande dag, kan eg jo minne om Piet Hein sitt dikt om hanskar... Ikkje alt eg fann idag som eg visste eg hadde, og kanskje har eg kasta noko eg kjem til å sakne?!

Ha ein fin dag, med eller utan rot!