Vekestart veke 35

Eg har dårleg samvit! Eg har eit minne om at eg brukte å ha ein skags vekestart på denne bloggen, sånn ca kvar søndag, men det er lenge sidan no!
Det har vore sommar, ikkje all verden til sommar slik den første delen, men sommar, ferie, tid borte, slappe dagar. Så har det vore tilbake på jobb, ikkje fulltid for meg, men rutiner som skal følgast opp, og trening som skal gjennomførast for ryggen. Så har det vore flytteførebuinagar og innkjøp og pakking med eldste junior, slikt går ikkje av seg sjølv, iallfall trur ikkje mor det! Og så kom godværet! Det har vore nonstop-sol ei veke! Lange, varme kveldar, mørket som kjem, levande lys på terrassen og middag og kveldsmat ute. Det har vore knott og mygg som konkurrerar om blodet mitt, og dertil dårleg søvn når det klør! Eg har ligge langflat i sola, og fyllt på D-vitaminlageret til vinteren og fått litt farge på ein bleik kropp! Viktig jobb! Eg har tatt med alt som kan gjerast ute ut i solveggen, bretting av klær, baking av pizza ++. Vi har vaska og beisa terrassen og sitte der endå meir. Vi har sykla til skogen og eit lite vatn og bada(ok, det var kaldt, men eg svømte!) Og på mine korte turar innom internett ser eg at andre blogga, eg ser interessante overskrifter eg tenkjer eg skal lese meir om seinare. Og eg har tenkt at bloggen min lever vel over endå ein dag utan nytt stoff!

Sol, blomkarse og henhekøye.
Sommar i august!

Sol frå skyfri himmel!

Baking i det fri!

Bading

Kveldsliv på terrassen

Det har den gjort! Overlevd altså. Men eg ser at det er få som er innom, de har vel gitt opp å vente på nye innlegg? Men i kveld skal de få litt nytt!

August er her! Det er ein fin månad(sidan eg feks har fødselsdag snart) Og iår med lange, varme dager og dei mørke kveldane som er så varme og lune! I skogen kjem meir og meir bær(eg har plukka multer i dag, ikkje så mange, men eg fann ei fin myr! Der kosa meg med litt i munnen og mest i posen. Multekrem på julaften er sikra, og vel så det) Men det er dogg i graset lenge om morgonen, enkelte planter seier at no er det snart nok, grønsakshagen er over sitt beste, det går mot haust. Og difor skal eg dele dette diktet av Hans Børøi med dykk, om august og at noko nærmar seg over. Litt mørkt kanskje, men flott!

August

Nattsvermernes ulne tid
august
med mugg og surmelk
og fallskjermslipp av løvetannfrø
over enger som sommeren har forlatt.
En smerte er overvunnet; himmelen legger
mjuke forbindinger av mørke
på de hvite nettenes
bankende sår av lengsel.

Aldri er jorda
jord som i august. Du kjenner
den eier deg. Føttene dine
peker uten misvisning
mot Jordens sentrum.
Og du hører billene
vri sitt lille bor av kitin
gjennom de dødes hjerneskalleer
djupt i gravene.

Hans Børli

Ønskjer deg ei strålande veke! Så skal eg prøve å vere i rute igjen med vekestarten frå no!

Bloggar eg les

I tillegg til dei i bloggrullen min, er eg innom ein del andre slik dann og vann.
Under her følger nokre av dei:

• jojobjerga
• Alt godt
• slagdama
• Et dryss kanel
• Fruen i huset
• Slike jenter
• And THEN some
• mammadamen

Det er sikkert fleire eg ser innom også, men det er desse eg kjem på no. Etter ein Facebook-dialog med

Lamme Tanker var det vel bloggarar over 35 år ho etterlyste, og alle desse er ikkje det, men det er litt lett blanding i kva desse skeiv om! 

Kva bloggar ser du innom?

Min indre hamster er på ferde igjen

Eg les litt her og der på nettet, kjekke interiørbloggar, spennande nettbutikkar... Å, så mykje eg har lyst på!
Eg prøvar for tida eigentleg å rydde huset slik at det blir plass til alle gjestane på laurdag, men innser at min indre hamster ristar på pelsen og er ute av vinterdvalen(den må vere heilt døgnvill, hadde det vore eg så hadde eg lagt meg ned igjen og sove vidare, snøbygene går, vinteren er ikkje over). Det kunne jo vore ei sjanse til å rydde og kaste og kvitte seg med overflødig lausøre, men nei...

Eg kan når som helst invitere omtrent 50 stykker til kaffe(dersom ein ser vekk frå at dei må sitte tett), med fruktsalat i desserskåler til iallfall 43 stykker. Så det kjekke serviset eg såg er det ikkje plass til!
Eg har nok blomstervasar til ein heil 80årsdag! Eg har serveringsskåler i kjellaren, sist brukt i ørtenhundre og grønkål, som kanskje kan kome til nytte ein dag? (Kvifor har hjernen min assosiert til "Kjekt å ha" med Ø.Sunde no? Den går som heismusikk bakerst i hodet) Så dei fine skålene eg såg på ein blogg kan eg berre gløyme...

Den som kjem heim  med så mange handlenett bør vel ikkje undre seg over fulle skap?!

Bokhyllene skrik etter luft...

Og eg har rydda gjesterommet... No står det stablar på vårt soverom med dei kleda som elles ligg på gjesterommet!

Noko må gjerast!
Eg tenkjer på inntaksstopp, sidan ingenting blir kasta. Ikkje heilt sant forresten, vi har nettopp kasta utslitet madrassar, gamal isolasjon frå loftet(ekte glasvatt, ekkel og stikkande) og byggeavfall! Men det vises ikkje på stova og i kjøkkenskapa.
Eg har hukommelse som ein gullfisk(liten dyrehage, både gullfisk og hamster!)og alle kjøpestopp blir gløymt så snart eg er i ein butikk. Eg ser at både lommebok og hus har godt av inntaksstopp, men så kjedeleg, da gitt!
Men idag har eg gjort ein innsats! Sidan eg fann ut at eg må slutte å kjøpe bøker, kom det naturegvis salg på masse bøker IDAG. Og mange av dei er slike eg har ønska meg! Men IDAG har eg ikkje kjøpt ei einaste bok!
Eg var ute på oppdrag med #morstutogkjør, og var innom nokre klesbutikkar medan eg hadde pause. Eg såg to kjolar eg kjente eg trong, den eine var til og med på salg og den andre var i rett farge og fasong, men eg kjøpte ingen av dei! Eg kjøpte heller ikkje ein einaste av dei 4 ulike og heilt uimotståelege lintoppane(eg lever elles etter prinsippet av ein aldri får for mange plagg i lin! Noko klesskapet flyt over av...)


No gjeld det berre å fortsette som eg har starta! Trur det skal gå greit til iallfall måndag :)
Wish me luck!

"Lever i tiden...

... forventer effektivitet" Då burde eg vel ikkje bruke så mykje tid på nettet?

Men eg er no tilgjengeleg i endå ein "kanal": instagram (er du der også, sa junior#2 med eit sukk)
Heiter kisabo og kan love endå mindre fornuft der enn her :)

Dagens bilder for den som ikkje er på instagram, kuldedokumentasjon(-18 er ikkje veldig vanleg, så vi går i skytteltrafikk for å fylle omnane og hente meir ved), sol og snø(vakkert, men kaldt ute, sett frå stovevinduet) og eg har allereie fått morsdagstulipanar, fantastisk fine! Så spørs det om det blir morsdagskake og fastelavensbollar i morgon?

Fastelavensbollar betyr at snart byrjar fastetida. Eg har ikkje eit veldig sterkt forhald til faste eigentleg, men tenkjer at det kanskje er lurt med ei nøysom tid av og til. Eg hadde eit år pause fra Facebook i fastatida, det var ganske fint, eg merka at eg etter nokre dagar med avvenning fekk betre tid. Ifjor droppa eg Pepsi Max i fastetida, det krevde litt meir, eg må vel tilstå at eg er ganske avhengig... Kanskje eg skulle gjere noko liknande i år og? Noko som krever noko av meg? Ikkje for å vere flink, men for å gje meg sjøl ei pause frå noko eg er "avhengig" av og vant med å få utan vidare.
Eg må tenkje vidare!

Vekestart veke 51

Akkurat no lurer eg litt på kvifor eg starta dette vekestart-styret!! (det var for å gje meg sjølv ei bloggoppgåve kvar veke, jada...) Men i denne søte førjulsstri, der nokon kvar kan bli stri, er det ikje så lett å rekke alt.

Stallen fylles opp, det er teikn på at det snart er jul

Englane til høgre insisterte på å bli med heim på laurdag, og det måtte dei få lov til! Meir sjarmerande enn desse skal det mykje til for å bli!














Det vart lussekattar denne veka

Gode vart dei og! (og borte) Og luciatoget mitt fulgte med.


"Æ tror det e enklar me jul for mæ enn for dæ", sa min eldste son idag, då eg hadde fortalt kva eg skulle bruke "fridagen"(eg var iallfall ikkje på jobb) min til. Eg starta dagen med å stå utanfor OBS! og vente på at dei skulle opne, saman med alle pensjonistane, det har eg aldri gjort før! Men det var verdt det, lite folk, lang liste og ganske fort ferdig. Så vidare med lista til eit kjøpesenter, der eg etterkvart unna meg litt kafeliv, og kunne krysse av punkt for punkt på lista. Til slutt heim, til mengder med reine klær som skulle brettast og fordelast.

Eg tek meg i å nynne litt på"vi hakke tid, for vi må..."
Eg har ikkje tid, for det er så mykje anna som kunne og kunne og burde vore gjort, og eg spring frå oppgåve til oppgåve.

Medan eg sukkar og skjær tenner, byrjar mannen synge på denne sangen...

Heksedans

Av Vidar Sandbeck

Og kjerringa hopper i serken sin og kaster seg rundt som en hvirvelvind.
For nå er det lemmer og liv om å gjøra med påsken og pinsen og jula for døra.
Ho fær over gølvet så fort ho vinn med pompen i været og knea inn,
for den som vil ligga litt føre sin neste han kan itte såvå når sola rinn.

Men tida er så altfor knapp, kan hende kjem ho for sent, for sent tel livets ende. 

Og kjerringa stamper i stua inn med kluter og koster og pusseskinn.
For nå er det lemmer og liv om å gjøra med påsken og pinsen og jula for døra.
Ho drev på i går tel ho nesten datt, men nå lyt a tørk over gølvet att,
for katta ho fly her med sølete labber og rakker tel huset hår enda natt.
Men tida osv.

Det kan itte seile sin egen sjø om ryggen blir rund som ett grislebrød.
For nå er det lemmer og liv om å gjøra med påsken og pinsen og jula for døra.
Og dagen den går i en kjerringdans med filler og såpe og møbelglans. Og når ho er ferdig da tar a det omatt og omatt og omatt foruten stans.
Men tida osv.

Og kjerringa roper åt gubben grå:Du får itte kom inn med skoa på
For her er det lemmer og liv om å gjøramed påsken og pinsen og jula for døra.
Og kjerringa rydder den sene kveld det gubben og onga har rote tel,
med tobakk og pipe og bøker og bilder og klosser og sneller og ludospell.
Men tida osv.

Og kjerringa vasker og gnir og gnur og aldri ho tar seg en løpartur.
For støtt er det lemmer og liv om å gjøra med påsken og pinsen og jula for døra.
Og gølvfilla går i en evig ring, nei, maken det fins itte her omkring,
så hvis at ho kjem i sin egen begravelse ville det bli tå de store ting!
Men tida er så altfor knapp, kan hende kjem ho for sent, for sent tel livets ende.

Eg kan ikkje skryte på meg så mykje vasking, da...men litt sant er det vel idet.

Men heldigvis var kvelden i dag avtala for lenge sidan, vi skulle på tradisjonell grautmiddag saman med gode vener, som har vore vener så lenge at det er bortkasta å prøve å gjere eit godt inntrykk lenger. Heldigvis! Det er berre å vere seg sjøl, slappe av og ta kvelden som den kjem! Full avslapping saman med vener er god medisin mot stressnakke.

I morgon er det jobb igjen, men no trur eg at det meste er under kontroll, iallfall gåvene, og uansett så kjem jula! Ha ein fin siste veke i advent!

I love your blog

Ok, engelsk på bloggen i dag, men det får gå for denne gong!

I går fekk eg denne fine bloggprisen frå Magefølelsen. Der skriv Heidi om mat for alle, men særleg allergimat, mat utan gluten, egg, mjølk osv. Eg kjenner Heidi frå "gamle dager" då kostholdet nok ikkje alltid var like gjennomtenkt, vi snakkar sjokolade til middag og høg kosefaktor :) Men vi har og delt husvære ein periode, og tok grep og åt fruktsalat til frukost og bakte riktig så grove grovbrød.

No er vet min tur å anbefale 5 bloggar eg likar og les regelmessig.

Eg startar med diamantisen. Diamantisen har eg vorte litt kjent med via Twitter. Ho kjem frå Norge, men bur i Hellas, og skriv mellom anna om kvardagsliv, natur og mat. Kikk innom! 

Neste blogg er Eva Cathrin - helt meg . Også Eva har eg møtt via Twitter, der er det mange fine folk! Eva skriv om dagsaktuelle tema og legg ut dei mest fabelaktige bilete!!

Eg får av og til spørsmål om eg ikkje syns det er problematisk å blogge på nynorsk... Nei, det syns eg ikkje, det er hjertespråket mitt, og eg har gode forbileter som har blogga på nynorsk lenge! Eg vil anbefale to: Den gode feen, som skriv mykje om interiør og om kreativitet, til inspirasjon for alle, og Tankar frå ein kvardag som skriv mykje om nettopp det, men og om livet og refleksjonar rundt det.

Siste blogg ut er Amelie 78. Ho skriv refleksjonar rundt livet, om jobb og om morsrolla. Ein klok blogg!

Med bloggprisen følger disse oppgavene:

1) Takke og linke til bloggeren man har fått awarden fra.
2) Gi utmerkelsen videre til fem blogger og gjøre dem oppmerksom på det.
3) Kopiere post it lappen og sette den på bloggen.

Det skal sendes til kanskje en ny blogg eller en blogg som ikke har så mange følgere ennå.

Novemberoppsummering

Etter å ha gått høgt, breitt og hardt ut, får eg vel oppsummere november no. Korleis har det gått?
Eg syns ikkje november har vore så lang i år, det kan ha flerie grunnar enn mine gode forsett naturlegvis, men eg trur mitt ønskje om å finne november har hjelpt meg.

Kva har eg gjort?

• Vi har laga eplekake, kanelsnurrar og cupcakes, det hadde vi kanskje gjort elles og, men no veit eg at eg har ete eplekake av sure eple frå heimstaden min, og den var god! Og når ein lagar slikt, er det kjekt å invitere gjestar, så det gjorde vi!
• Eg har ikkje tent så mange lys inne, men eg har brukt lyslyktene ute kvar gong eg har venta besøk. Det er kjekt å kome ein stad der det lyser!
• Eg har hatt sykveld, vi sydde og prata og åt klementin. Vi lærte av kvarandre, vi skratta og vi sydde på nytt når det vart feil. Og det vart det, for alle...
• Eg har ikkje høyrt på P3, eg har halde meg til det kjente, eg har ikkje høyrt mykje musikk, men eg har lese masse. No er eg igang med "Kafka på strande" av Haruki Murakami.
• Lange turar i mørket har det ikkje vorte, uviss grunn... Men eg har gått kveldstur med mannen og ein søndag gjekk jammen heile familien søndagstur i marka!
• Eg har nesten ikkje kjøpt julegåver, det må eg vel snart starte med... 

Eg har ikkje tatt fram julemusikken, men i morgon :) då skal eg fram med lett og enkel musikk, så kjem den "tunge" musikken etterkvart som vi nærmar oss jula.
Eg har ikkje ete julemat, ikkje kjøpt marsipan, men må tilstå at i går kjøpte eg pepparkaker....

Og i dag har eg ete "mugne menn" av restane frå i går:

Pepparkaker med blåmuggost(idag Blå Selbu) er nesten det beste som finst! Det er noko med kryddersmaken og det skarpe i osten! Med litt fikenmarmelade ville det kanskje vorte endå betre? Eg må føre fikenmarmelade på "to-do" lista.

I morgon startar desember, eg har ikkje klar adventskalenderen, men har kjøpt litt som skal pakkast inn. Eg har etter mykje leiting funne posen med adventspynt, og testa at eg har lys i stjerna, så den skal opp i morgon. Adventsstaken er klar, med lilla lys og granbar.
Eg har kjøpt safran, så kanskje blir det lussekattar til Luciadagen?

Søndag skal vi ha gjestar, då har eg lyst å lage adventskrans av gjærdeig. Vi får sjå kva eg rekk, i morgon er det jobb, julemesse og julebord.

Den vanskelege nesteblogg-posten...

Dette er jo ikkje den vanskelege 2.bloggposten, for eg har kome mykje lengre enn det! Men etter sist innlegg fekk eg kjempe-mega-super respons og får nesten bloggeskrekk! Det er superartig at så mange les bloggen, (og bitte litt superskummelt) og kva iall verda skal eg skrive om no? Sjøl eg har ikkje så mange tabber å by på, at eg med det første kan toppe fårikålhistoria :)
Det får bli ei kvardagsoppdatering!

Det er haust ute! Vakkert, vakkert og vedmodig! Det er haustferie og litt tid til å sjå seg rundt. Desse to bileta er teke i litt ulik retning fra huset vårt, eg bor ikkje heilt i skogen, sjølv om det ser slik ut på det eine biletet :) Men jammen er det fint å ha så fine tre rett ved huset, med slike farger (og rett bak "skogen" går det ein trafikert veg)
Det andre biletet er tatt idag, ikkje verdas beste med mobilen, men ser de regnbogen? Er den ikkje flott? Det kome ei saftig regnbyge fra dei svarte skyene etterkvart... men først var det sol og lys og farger!

Idag har eg hatt "haustferie", i litt konsentrert form! Igår feira vi 19års bryllaupsdag, vi var ute og åt god mat of feira oss sjøl! Idag har vi berre latt humla suse, ete lang frukost med omelett og nypressa grapefruktjuice, vore innom det nye kjøpesenteret(korleis kan det ha seg at det er eg som brukar mest pengar ein slik stad?!) og gjort småting heime. Skikkeleg feriekjensle, skuldrene senka seg, men i morgon er det tilbake til normalen igjen.

 Eg får prøve å halde fast på mottoet mitt:

Livet

Er det ikkje Odd Børresen som seier han vil skrive ei vise om livet? Som fan av Odd, syns eg han har greid det godt, "Noen ganger der det alright!" er ein fin sang.

Eg tenkte eg skulle skrive litt om livet idag, for "noen ganger er det alright" og andre gonger ikkje.
Måndag hadde eg fødselsdag, eg innrømme glatt at eg likar å lage selskap og feire! Fullt hus, store gryter, latter og alvor, prat og rot (og så likar eg når huset er tomt etterpå, det heng framleis i at huset vart rydda til selskap, kjøleskåpet er fullt av restar, det ligg twistpapir under sofaen og eg kan sette meg ned og sjå ut i lufta) Eg er så heldig å ha ein del av slekta i nærleiken og dei kjem når eg inviterer, så på søndag var det ekte søndagsmiddag med elgsteik og tyttebærsyltetøy. Så pratar vi, legg litt planer for nye treff, vi funderar på korleis det ville vere om vi bytta jobb for ein dag eller to(vi har m.a. kokk, lærar, sivilingeniørar, bioingeniør, sjukepleiar, byggingeinør og nokre studentar og skuleelevar) og vi bygger lego! Vi bygger meir på familiehistoria vår, og dei små blir kjent med dei store, og omvendt.Det var ein alright dag!

No er festen slutt, det er ikkje kake igjen...

På måndag kom kvardagen utan festkjensle, då nokon vi kjenner kom i full fart med helikopter til sjukehuset i byen, brått var det ikkje ein alright dag! Det vart organisering og bekymring, men også samhald! "Korleis kan vi hjelpe til? Kva trengs?" Telefonen vart flittig brukt. Vi er så heldige at vi bur nært sjukehuset, og kan vere litt "pasientven". Etter litt om og men har pasienten fått god hjelp på sjukehuset, vi har senka skuldrene og det ser ut til å gå bra.

Idag er det fredag, det er sofa og god tid, pasienten er vel heime hos seg sjøl, mannen er på guttetur, eg er i sofaen med beina høgt før eg skal kjøre ungane på fredagssamling, og i morgon skal eg ha "sykurs" for nieser og søster! Jaja, dei stiller vel med velvilje og tålmod? Gler meg til jentedag! (Tenåringane mine meinte dei skulle finne på noko som innebar at dei ikkje skulle sy!)

Pludreblogg

Altså ikkje å forveksle med pudderblogg, eller rosablogg som det og blir kalla. Eg har lurt litt på kva slag blogg eg har, for det finns jo så mange katergoriar, det er rosablogg, mammablogg, matblogg, interiørblogg, fotoblogg, bokblogg, og sikkert mykje meir som er høgtravande og klokt og kallast fagblogg eller meiningsblogg.  Eg er ikkje heilt der... og eg kjenner meg ikkje igjen i nokon av desse merkelappane.
Eg er kanskje litt av kvart og litt av alt, og difor trur eg at eg seier eg har ein pludreblogg!

Hadde eg ein interiørblogg kunne eg spesialisert meg på blomservasar?

Eg kunne hatt ein turblogg og skrive om mine barndoms fjell, her representert ved Ølsnøsa og Herjevatnet.

Men skoblogg, det kunne eg hatt! Desse gjer kvardagen ein touch av glamour ;)

Det er forfattaren sjølv som har vind i håret!

Hådarbeidsblogg kunne eg kanskje hatt, det mangla ikkje på prosjekt iallfall...

Eller matblogg? Tenkjer eg fortsett å pludre :)

 

 

 

Debbie

er eit nytt kjennskap eg har gjort idag. Ho er ein tropisk storm og ville være med i Disney Hollywood studios, med den følgje at ikkje ein tråd var tørr då vi kom heim!


Men vi har opplevd forskjelleg lell:) For til forskjell frå Trøndelag er det varmt sjølv om det regnar og bles. Og det er faktisk varmast ute, sidan air condition er på overalt inne, så eg gjekk ut for å bli varm(ikkje standard for ein nordmann!)

Nokre glimt frå igår, då vi var i Disney Magic Kingdom

Vi bur på leilighetshotell, det er luksus med kjøkken, vaskemaskin og fleire bad!



Eg får ikkje lasta inn bilete idag, så det får bli seinare:)

Ferieblogging

Det er ferietid, det er utlandstur og det er familietid!
Fredag reiste vi på årets ferie :) reiseruta var København-Toronto-Orlando. I København åt vi frukost, før vi oppdaga at flyet vidare var forsinka pga torden i Toronto. Heldigvis finns fine kvilestolar i stillesona, dei skal vi finne fort neste gong!
Men omsider gjekk flyet vidare, og då vi kom til Toronto utpå ettermiddagen var flyet til Orlando reist utan oss... Eg fekk oppleve noko nytt, å bli ropt opp på flyplassen :) det var ikkje verre enn at dei hadde nye boardingkort klare til meg. Så vart det sushi og pizza før vi reiste vidare. Det vart seint på natt før vi kom fram, 28t frå vi sto opp til vi la oss, men det gjekk greit(iallfall nesten, vi var litt uggne i kroppen og slappa)
Laurdag morgon kom vi oss opp, fekk henta ut leiebil og etter litt plunder med GPS fann vi vegen til Disney og der sto jammen Margrethe og gjengen og venta på oss ved inngangen! Ikkje verst:)
Kort oppsummert: fredag frukost i Køben, middag i Orlando og kald drikke i Orlando! Laurdag: Frukost i Magic Kingdom, litt solbrent i overskya, varmt vær og middag på hotellet.
I dag regnar det, men vi er klare for nye eventyr!

Design?

Ein blogg skal jo sjå ut på ein eller annan måte...trur denne vil endre seg stadig vekk framover etterkvart som eg lærer. Men ein designblogg vil det ikkje bli ;) Ikkje interiørblogg heller... Men å lese interiørbloggar er artig, det vises berre ikkje så godt her heime :)

Sko derimot...