lørdag 29. september 2018

Laurdag i september

Eg skal ta ei lita pause frå Italia-bilder. Trøndelag i september har sine gode sider. Og nokre litt våte, kalde, forblåste...

Etter frukost tok eg på ull og vind og vasstette klær og stakk i skogen. #mykindofmindfullness

Overraska meg litt å finne snø i høgda, men det burde vel ikkje gjere det, med tanke på været i går. Men heldigvis er det enno masse haustfarger igjen, og blåbær og tyttebær, om ein leitar godt.

Blåbær

Sopp

Snø og lyng


Etterpå har eg bakt rundstykker (for når ein ventar sonene heimom er det ikkje nok med rare mûslibrød og knekkebrød, syns mor) Og etter ei veke med berre meg sjøl i kosten, avanserte eg frå bakt brokkoli med nokre skinkebitar til lammekotelettar og tsatziki og eplekake til dessert. Hm, meir avansert mat gir meir oppvask.

Eplekake. Med havregryn og kesam.
Og veldig mange epler!

fredag 28. september 2018

Italia bilder #4

Idag kom det ein pling då eg køyrte til jobb. Det var under 4 grader og fare for glatt veg. Det har vore vind, regn, sludd. Facebook melder om vintervegar. Eg er glad eg ikkje skal kjøre langt, for eg har sommardekk på bilen enno. 

Det er godt å drøyme seg tilbake til sist fredag, og tur i Italia. Sol, Middelhavet,  stiar i fjellsida, pizza på fortausrestaurant og fine byar.  



torsdag 27. september 2018

Italiabilder #3



Castello san Giorgio

Borg og utkikkspunkt i La Spezia.


Italiabilder #2

I Lucca var det kunst i gatene. Masse papirkunst av ein engelsk kunstnar som heitte James Lake. Det var skulpturar mange stader. Fasinerande! 

Desse to skulpturane sto i ein gang inne i bymuren.

Struts.
I papp.
Og hovedet i sanden.

Guten langt der framme, er berre papp.
Men utruleg livaktig.



onsdag 26. september 2018

Italiabilder #1



Nokon hadde sett att sykkelen sin i ei bakgate i Lucca.
Det blir fort eit stileben.

Italia

Fem dagar miniferie i Italia.
Mat, drikke, sol, varme, gode vener. Eit friminutt i kvardagen.
Eg reiste med høge skuldre, det var så mykje som skulle på plass før vi reiste. Jobben skulle leggast til side, men ein del ting skulle gjerast før eg reiste. Vi skulle pakke, ordne huset, vi sto opp nesten midt på natta.

Men så kom vi fram. Til varme, vener og skuldrene senka seg. Det var varmt. Mellom 25 og 30 gr og sol frå skyfri himmel kvar dag. Og varme, mørke kveldar, uterestaurant og mygg.


Resturant i vatnkanten. Kom med eigen båt og henta oss.

Så kva gjorde vi?

Vi tok tog. Det var fint når ein har vore oppe ein halv dag før togturen starta. Berre sove litt i togsetet, lese bok, sjå på landskapet, undre seg på kor langt det er igjen. (og etterpå tenke at tog er ekstra fint, fordi nokon av dei andre punkterte på motorvegen, tog punkterer sjelden!)







Vi åt mat. Mykje god mat. Frukost på kafe, foccacia, croissanter, sjokoladefylt bakverk, cappucino og te. Servert i kanne, som er den ultimate luksus for meg. Lunsj på kafe, treretters! Ok, eg åt ikkje treretters til lunsj, men det kunne eg ha gjort. Salat, pizza, pasta, pai, grønsaker. Is i gågata, sitronsorbet. Karamellis. Middag på kafe. Fireretters, minst. Mange forrettar, pasta med ulike sausar og hovudrett og dessert. Mykje sjømat. Tiramisu til dessert.

Lucca

Klesvask på veggen

Varm dame

Vi gjekk. Mange steg kvar dag! Rekorddagen inneheldt omtrent 23000 steg. Vi var i gamlebyen i Lucca. Gjekk på bymuren, vandra i tronge gater. Såg klesvask som hang på husveggen, akkurat som på film. Såg i butikkar. Prøvde sko. Vi gjekk i Cinque terre, frå Monterosso al mare til Vernazza. Etter lunsj gjekk vi vidare til Corniglia. Gjekk i gatene i La spezia. I båthamna. Til borgen i La spezia. Vi gjekk på matmarked. På søndagsmarked. Der var det mange intalienarar.

Portovenere

Vernazza

Corneglia

Hamna i La spezia, det er ledig plass til båten vår!
Vi var på båttur. Til og frå ein resteurant på ei øy utenfor Portovenere. Frå La spezia til Monterosso, ute på Middelhavet. Turistfraktebåt, jada, men det var så fint. Sol, sjø, fuglar, byer og gardar som kunne vore med i "Der ingen skulle tru at nokon kunne bu" når som helst!

Middelhavet!

Vi (eg) shoppa. Ja, det vart sko, og ein linkjole på salg, fordi det var så varmt at lin var det einaste rette. Vi kjøpte ost og pølse og skinke på matmarkedet.

Gule sko! Italienske sko.
(Og les gjerne "Italienske sko" av Henning Mankell.
Ikkje særleg mykje om Italia eller sko, men god bok)
Fornuftige sko!

Shopping


Så var turen slutt. Det var tog tilbake til Milano, og ein travel sprint med koffert i søndagsrushet på Milano centrale (togstasjonen) for å rekke flytoget. Inn på flyplassen, levere koffert og gjennom sikkerthetskontrollen og så kjem kvardagen brått litt nærare.

Livet på ein togstasjon

Ein slik tur, med folk ein kjenner godt. Der det går fort mellom alvor og latter, der ein kan ta både litt tunge tema og veldig lette samtaleemner. Det er rikdom det! Det var ein skikkeleg energibust å ta ein haustferie i sommarlege Italia. Gode minner til minneboka!

onsdag 19. september 2018

Lang dags ferd mot natt

Nokre bloggar lagar slike time-for-time-innlegg. Idag prøvar eg, men eg har ikkje riktig alle timar dokumentert,  for det har vore ein lang dag!  


Vi sto opp før klokka 04.00! Det gjer vi sjelden. .. pakka ferdig kofferten og


før kl 05.00 satt mannen og spela flygel på flyplassen. (PS flygelet treng stemming)


Vi hadde kome til København før kl 08.00. 


Lunsjen åt vi då vi kom til Milano kl 10.30

Togstasjonen i Milano

  Etterpå sette vi oss på toget til La Spetzia på den italienske rivieraen.  


Her er det fine,  flislagte fortau nokre stader.


Sjarmerande gamlebyen rusle i.

Sjømatpasta

Og god mat!


Og god hotellseng,  håpar eg,  No treng eg sove!

I morgon er ein ny feriedag! Då skal vi kjøre tog, sjå italiensk by, ete italiensk mat og på båttur. 

tirsdag 18. september 2018

Haust

Hausten er mange ting.

Dei klaraste dagane med sol frå skyfri himmel.
Dei gråaste dagane med regn og eit så kaldt drag i lufta som du ikkje har kjent sidan tidleg på våren.
Dagar då det passar å ta fram eit tjukt skjerf og vottar på veg til jobb.
Dagar då det å sykle gir naglebit til langt utpå dagen.
Dagar der ein frys fordi ein trudde på værvrselet og ikkje tok ulljakke.
Dagar då ein har altfor mykje klær på, fordi ein trudde på værvarselet og tok ulljakke.
Tyttebær i skogen. Mange, raude skattar som kan bli syltetøy eller trollkrem. Har du smakt trollkrem med heilt modne tyttebær, rik på smak av haust og for min del barndom? Bortsett frå at eg likar trollkrem betre no enn eg gjorde då.
Sopptur saman med mannen. Eller, tur saman med mannen, han plukkar sopp og eg går ein ekstra runde og finn litt bær.


Haustfarger på trea og lyngen i skogen. Og på hekken rundt huset. Lauv som fell på plena (og hageblomster som skulle vore rydda bort og kjøkkenhage som skulle vore klargjort for vinteren)
Butikken full av norske epler og masse rotgrønsaker! Eg får lyst å berre kjøpe pga fargene og luktene! Og bake opp eplekake på eplekake, bake rødbeter og ete med fetaost... Brokkoli bakt med salt og chili. Fårikål. Grønsakssuppe. Nam!


Å vakne på morgonen og høyre regnet tromme på ruta, og prøve å huske om det er tirsdag eller laurdag.
Drikke tekopp etter tekopp og brenne lys og lese bok.
Den første dagen med vedfyring. Lukta av bjørkeved, og roa i å sjå på flammane i omnen. Vi hadde den i helga. Og vi har bua full av ved, så det skal bli fleire helgemorgonar der eg fyrar opp og et frukost i sofaen medan eg høyrer på NRK Klassisk og les avis.

mandag 17. september 2018

Ut på tur!

Og denne gongen skal eg lenger enn til lokal skog!

Eg skal til Italia! Landet med pizza, pasta og gelato... Nam!
Eg har aldri vore der før, no skal vi reise saman med ein heil gjeng gode vener. Programmet er lagt, vi skal både få med oss Cinque Terre, Lucca og mykje anna.

Cinque Terre
http://www.domondonart.com/product/cinque-terre-italy-maranola-pink/
Det eg forbind mest med Italia, er turen mamma og pappa var på der i 1973. Eg var 5 år, og syntes nok dei var langt vekke. Ikkje at eg huskar det, for eg var saman med storesøsken og besteforeldre, men eg var nok ein mammadalt. Når eg oppfatta at Italia er ein støvel, huskar eg ikkje, men støvel=sko=lik bra land vil eg tru, no.

Då mamma og pappa kom heim, etter å ha sett på lastebilar og gravemaskiner, køyrt buss i Milano og sett at nokon rett og slett bar vekk ein liten Fiat som sto i vegen for trafikken, vanka det gåver! Storesøskena mine fekk tyggegummi (dei fekk sikkert noko meir, men eg huskar best tyggegummien!) Dei fekk kvart sitt metallskrin med tyggis, det var uendeleg mykje tyggis! (for ein 5åring) Eg trur eg fekk ei pakke, eg var for lita fro meir. Men eg fekk dukke! Som kunne gråte, og synge. Trur det var noko eg hadde ønska meg. Eg var litt skuffa over at ho hadde mykje svart hår og festsminke, men det var ei babydukke, basta! Ho skreik, eller sang, når du sette plate inn i ryggen på henne. Ho vart døpt same dag som kronprins Haakon Magnus, i eit gult, stort badehankle. (huskar ikkje om ho hadde noko namn, eigentleg, kanskje det var Sonja eller Märtha?)

No skal eg pakke, for ein tur tilbake til sommaren, for værvarselet er svært lovande for sandalar og sommarkjole. Eg har leita fram passet, reisehåndbok, lesestoff. Idag har vi bestilt togbillettar frå Milano til La Spetzia. Eg må telle pengane mine, det er så mykje eg har lyst på. Parmesanost, parmaskinke, is, salat, tomat, fin middag, sko og vesker. Vi får sjå.

Eit snev reisefeber og nesten tre dagar til avreise!

søndag 16. september 2018

Fårikål

Idag har vi hatt fårikål til middag. Med norsk nypotet til (heiter det nypotet lenger i september?) Det var akkurat så godt som det brukar vere. Kanskje fordi vi ikkje har det så ofte? Kokt lenge i går, sett i kjøleskap i natt, kokt vidare idag medan potet kokte. (Å kjøle ned fårikål i kald vatn har eg dårleg erfaring med)
Så kan ein jo diskutere om det luktar godt, men det høyrer liksom med!


Eg huskar første gong eg laga fårikål. Vi var ganske nygifte, altså er det snart 25 år sidan. Huset vi leigde, var rosa. Inne. I dei fleste rom. Og med rosa meiner eg babyrosa... Trur dei som budde der før hadde fått tak i 20 liter maling, minst, som dei hadde brukt på stove, kjøkken, gang og soverom. Berre doen var ei anna farge, den var ca 1 kvm, utan vindu og var mørkeblå. Iallfall fekk vi lov til å male om! På stova skulle vi tapetsere også, og det var vi ikkje så gode på (=hadde aldri gjort det før) så vi inviterte ein kompis til å hjelpe oss. Veldig usikker på om han hadde gjort det før heller? (Eg var ganske indisponert til oppussing, for eg hadde prolaps i ryggen, den gongen også, når eg tenkjer meg om. Problem med å løfte og problem med å stå) Men som Pippi seier "dette har jeg ikke gjort før, så dette kan jeg", så vi gjekk igang med innstsvilje og godt humør!

Når ein er nygift, det er haust og ein har invitert til dugnad, vil ein jo gjerne imponere med god mat som takk. Eg hadde laga mykje mat før, pizza, brød, lasagne, stekt fisk, hjortesteik og ymse anna, men aldri fårikål. Det var liksom utanfor hybelkjøkkenstandard. Det var rett og slett ein slags test på om eg kunne lage mat på rett. Eg las oppskrifter og kjøpte kjøt og kål. Eg fulgte oppskrift, og vart litt skuffa over kor enkelt det i grunnen var. Legg lagvis og la koke, lenge. Voila, bon appetit og værsegod og her er det fårikål.  Eg brukar den oppskrifta enno. Det hender eg leitar litt rundt på internett, men det blir den same, gode, gamle oppskrifta som vinn! Kvifor endre noko som funkar?

Og i morgon? Då blir det fårikålrestar.

PS: lammekjøtet er frå i fjor. Smakte like godt. Smart å ete ut av frysaren no, mest mogeleg. Den fylles med bær, seinast i dag vart det ein liter tyttebær med heim frå skogen, og elgjakta startar om ei veke.

onsdag 12. september 2018

Rekk eg det før frostnettene?

Eg strikkar. I ull. Strikkinga vart lagt vekk før sommaren. No har eg tatt den fram igjen. Eg nærmar det nervepirrande øyeblikket, eg skal klippe opp... skal berre strikke ferdig stolpane.  Spørsmålet er: blir eg ferdig før frostnettene? Får eg ei varm jakke å ta på meg?
Eg har og lurt litt på kvifor eg starta på eit så stort prosjekt, på så tynne pinnar.  Eg har ikkje svaret. Eg kjem til å gjere det samme igjen.
.


(Vi kan også stille spørsmålet: tørr eg nokon gong klippe?! Tenk om eg gjer feil...
Men eg må det, for eg har meir garn, gult, som skal bli genser. Eg må bli ferdig med kofta, slik at eg får frigjort strikkepinnane.  Eg har bestemt at det ikkje er lov å kjøpe nye strikkepinner i storleik 3,5)

mandag 10. september 2018

Alt eg ikkje gjorde på fredag...


...gjorde ikkje seg sjøl i løpet av helga. Så idag har eg
  • bakt boller (til besøk i morgon)
  • vaska kjøkkenvifta
  • vaska badet
  • funne fram kubbelys til kveldskos. Kveldane er mørke og det regnar ute, det luktar haust. Men det er mystisk varmt til å vere september.
  • betalt rekningar, før fristen.
  • skrive handleliste til i morgon.
  • bretta veldig mykje reine klær. Så mange at eg let dei siste få ligge litt til modning, dei kan eg brette ein annan dag.
  • lagt utesofaputene til tørk, for dei låg ute. I regnet.

I tillegg byrja mannen på vedstabling. For vi er førebudd på ein lang og kald vinter, og har masse ved! 
Og eg sov middag! Det aller klokaste valet eg har gjort i dag. Eg hadde aldri vaska kjøkkenvifta dersom eg ikkje fekk sove litt først. Så då får det vere at det ikkje vart den trimturen eg hadde tenkt. Eg må ha att noko å gjere i morgon også!

søndag 9. september 2018

Tyttebærsøndag

Etter felles frukost med mannen og musikkjunior, og gudsteneste, var eg klar for tur.
Eg visste at skogen var full av tyttebær, og eg har ikkje har ikkje hatt tid til å plukke. Idag vart det tur. Og full bøtte med tyttebær! Åh, så godt for humøret! No har eg renska og sylta og bæra har kome i frysaren (og eg har ete tyttebær og yoghurt til kveldsmat)


Skogen har byrja å få haustfarge. Det luktar godt av bær og lyng og myr. Det var masse folk i skogen, det forstår eg godt. Eg prøvar få planlagt inn ein tur i skogen til veka også! Det står att masse bær. Å vere i skogen er mi beste oppskrift for lave skuldre og er ein slags mindfullness.




Mannen leita etter sopp. Han fann ikkje så mykje, dessverre. Men han fann ein elg, som skvatt då det viste seg at dei delte territorium ei lita stund.

Lys på ein laurdag

Laurdag er ein dag eg trur eg skal få gjort så mykje. Det går ikkje alltid som planlagt. Men igår rakk eg ein del, om ikkje anna.

Vi fekk levert ved.
Vi var på båttur.
Eg vaska klær.
Handla mat. Åt middag saman med musikkjunior.
Satt i ro i sofaen og løste kryssord.
Gjekk tur seint på kvelden, i stupmørk septemberkveld, og det var så godt og varmt. 17 gr kl 23 er ikkje normalt for september.

Det var så fint lys, Både på sjøen og på kvelden.


Horisonten er bein. Ikkje båten.