Det er for lite snakk om sko!

Sko er av det som gir livsglede og ein liten smak av luksus i kvardagen!

Eg har kjøpt nye joggesko, godt å ha, men ikkje så spennande. Supre til tur i marka, men ikkje elles. Eg har ganske nye sko til å gå til og frå jobb, veldig fornuftig og nyttig, Luksus? Tja. Nye sandalar til å bruke på jobb er nødvendig, men meir slik kvardagsglede.

Desse her derimot! Dei er ikkje spesielt gode å gå i, dei er ikkje praktiske og dei er definitivt ikkje noko eg treng! Men dei gir eit løft for humøret og lys i kvardagen! Slike sko blir det aldri nok av.

(Eg forstår forresten ikkje kvifor eg har tilnamnet Irmelda?)

Italienske sko!

Då vi var i Italia i haust hadde eg ei heilt klar plan om å kjøpe meg sko. Ei så klar plan at mannen innsåg at han berre måtte henge på den siste dagen når eg gjekk målbevist til verket og planen. Før eg fekk meg sko, ville det meste anna bli sett på venteliste.

Til slutt fann eg ein fin skobutikk. Mannen sette seg på ein ventestol. tok fram ei bok og eg fekk beskjed om å ta meg god tid. Dette var ein så fin butikk at du slett ikkje kunne finne ein sko i hylla og berre prøve.  Nei, her måtte eg peike på utstillinga og forklare kva sko eg ville prøve, så vart den rette storleiken henta på lageret og eg fekk prøve. Feil storleik? Dei henta ein anna storleik. Og såg eg plutseleg eit anna par som eg hadde lyst på, var det samme prosedyre. Til slutt sto det mellom to ulike. Håndsydde, italienske gule sko, eller gule, høghæla pumps. Altså to ulike par med gule sko... Valgets kval! Og ein kan knappast kjøpe to par gule sko på samme dag? Dei kosta tross alt litt...


Etter prøving og synsing og prøving og elle-melle, vart det dei gule, håndsydde (som takk og pris var på sal) Dei var tross alt italienske!

 Italienske sko!

Desse har vore med på fest og julebord og familieselskap til no. Eg er så fornøgd!

Men vel heime i Noreg byrja eg å angre. Ikkje på kjøpet, men på at eg ikkje hadde kjøpt begge para... No byrja ei ny jakt. Eg har leita på nettbutikkar, søkt etter gule sko, yellow shoe, gule med hæl etc. Og eg har vore innom alle skobutikkar eg har gått forbi. Det viser seg at gule pensko ikkje er så vanleg på vinteren i Noreg.

Men så: der sto dei! I ein av dei lokale butikkane. Ikkje var dei så dyre heller. Men eg måtte tenke meg om, og kven veit, kjem dei på sal snart? Nei, det gjorde dei ikkje, verken romjulssal eller januarsal. Og klok av skade, så har dei no fått ein god og trygg heim, eg kunne ikkje risikere at nokon annan tok dei rett framfor nasen min medan eg akkederte for eller mot kjøp.

Skogal, sa du?

Mindfullness i august (not)

Du veit ho dama på butikken,  ho med 3 lange lister i hånda med alt ho skal handle, mord i blikket og ein stakkars mann som kjem etter med full handlevogn?

Der har du snart meg!

Eg har liste på liste, vaknar og tenkjer på blomster og bordkort, "vi skulle jo hatt ein seglbåt på bordkorta"!, plagar mannen med spørsmål om kaker og meny og lurer stadig på kva eg har gløymt. Noko må det vere?

Det er berre litt over ei veke igjen, så feirar vi dag!

Det roar seg litt, men eg blir forundra over kor engasjert og forvirra eg blir over alle val og problemstillingar... Eg er ikkje den coole dama som tek alt på strak hand! Same kor mykje eg ville likt å late som om eg er det. Eg får øve, slik at til neste runddag eller anna storselskap skal eg framstå som Mindfulnessens dronning! (kanskje)

Men eg har kjole klar, og sko og eg har klipt meg. Og snille frisøren slo til med massajestol og hodebotnsmassasje og god, god tid. Ho har nok sett stress før!

On the road again

Vi skal på tur igjen. Og vi skal feire. 

På mystisk vis er det tid for jubileum. 50 år, er ikkje det gamalt folk?! Det er rart å bli 50 (men altså, det er vekevis igjen til eg blir 50! Medan mannenn vart det for vekevis sidan), for det høyrest vakse og ordentligt ut, og eg kjenner meg ikkje slik... Men det er eit høve til familiefest, og det skal vi ha!

Eg har ei indre hurpe og husmor som slår til når det nærmar seg feiring...på godt og vondt. Men no byrjar eg tru vi kjem i mål, mat er bestilt, kake, bordpynt, gjester kjem, været lover bra. Qui er snart ferdig, mannen har plukka ut mengder med bilder.

Og eg har gamal kjole og nye sko!

1.søndag i advent

Endeleg fekk eg tenne adventslys igjen! Åh, adventsstake og lilla lys og sein frukost og naturlegvis sang. For første gong berre mannen og eg. Det var litt rart! Så det måtte vi snakke litt om, livet utan barn i heimen... Kjenner oss litt eldre, på ein måte.

Etterpå gjekk vi tur, i øspøs og vind. I fjøra. Det var vått og kaldt, og friskt og godt. Lite bilder, fordi eg ikkje orka å ta fram mobilen i været.

Så kjøpte vi med oss bollar, klementin og marsipan og reiste på besøk til studenten som sitt og les til eksamen. Han vart glad for besøk, og pause. (og eg kjente at enkelte ting er greit å vere ferdig med, han skal ha 4 eksamenar før jul og eg har vore der, og lengtar ikkje tilbake! Aldri har eg hatt så lite skitne klær, og aldri har skapa mine vore så ryddige som i eksamensperiodane.... Ser ut til at junior har betre lesedisiplin enn mor si!)

Etterpå har eg tenkt mest på kva eg skal gjere til veka, eg har sove litt på sofaen og no tenkjer eg at eg skal sjå "Jul i svingen"!

Dagens vers?

No tenner vi det første lys, 
åleine må det stå.
Vi ventar på det vesle barn
i krubba lagt på strå.

2.desember

Laurdag og god tid. Starta med å fyre i omnen, lage ei kanne te (frå adventskalenderen) og så landa mannen og eg i kvar vår sofa med frukost og julemusikk. Det tok litt tid før vi kom igang med noko særleg meir! Det er så godt med slik roleg start, og det har vore mange helger i det siste med mykje program.

Ser du ekornet opp på greina?

Men litt har vi fått gjort, både rydding, tur i skogen og adventspynting.

Alltid kaos før kos!

No er det lilla dukar, lys og stjerna er oppe. Godt med lys i mørketid, for snøen som fall igår, har regna vekk idag...

Adventsstaken kjøpte eg i studietida, den har ligge i kjellaren i årevis. Dei siste åra har eg stort sett brukt kubbelys, men i år hadde eg kjøpt vanlege lys, så då fekk eg lyst til å bruke den igjen. Etter ein vask var den god som ny, og no får den stå på eit brett(elles blir duken full av talg) saman med englekoret.

Snart blir det pizza, og kanskje ein film?

Er det advent snart?!

Eg har vore på Plantasjen idag. Det slår meg ar det snart er jul! Og at eg gler meg.

På Plantasjen har dei juletre (muleg dei berre har kunstige enno?) Juleblomster, julepynt, julelys+++ Og det er adventspynt, amaryllis og sviblar (og dersom du ikkje fortel det vidare, så kan eg fortelje at eg har kjøpt sviblar og mose og ekstra lys til juletreet) Eg har kjøpt snop til adventskalenderen på jobb. Eg måtte nesten ta meg saman, for å ikkje gå heilt i julefella!

Så no må eg ta litt grep, for det er tross alt over ei veke igjen til 1.søndag i advent, og såpass bør eg greie å vente. Eg skriv difor lister. Det ligg ei liste på jobb, ei på kjøkkenbordet, ei i veska, ei ved     pc´n... Kva som står der? Litt ymse, men no kan eg jo prøve meg på ei liste her og!

• julemusikk! Eg skal kose meg med julemusikk i heile desember. NRK klassisk, Spotyfy og jule-cdane mine. Jada! (noko seier meg at andre i heimen kan få overdose)
• julebakst, eg MÅ ha berlinerkransar, krumkaker og bruke pinner. Av erfaring blir det alltid meir. Rundstykker, knekkebrød og julebrød. Nam!
• juleblomster, eg er som sagt igang med sviblar. Det er berre så vidt lov, kjenner eg. Kanskje eg skal ha ein ny azalea? Den forrige blomstrar no, tredje sesong. Amaryllis, krans på døra, nokre greiner med lys og pynt i trappa. Uendeleg mange muligheiter!
• adventskalender. Eg har ein tekalender, den skal eg kose meg med kvar dag etter middag, gjerne saman med kalenderen på tv. Men ein liten felleskalender med mannen, det er kjekt (og av ting som ikkje kan snakkast høgt om, kjøpte eg ein på salg i mars eller noko slikt, den er passe for oss to i heimen) Ungane er jo altfor store til kalender, NOT! Men dei får ikkje før dei kjem heim på juleferie, då blir det mindre å pakke inn også.
• julekrybba kjem fram 1.desember, og så prøvar eg å huske å sette inn ein figur kvar dag fram til julaften. Trur kanskje eg har nokre nye englar som skal inn i englekoret i år. Eg har iallfall ein ny juleflamingo, den skal på juletreet i selskap med julealligatoren.
• LYS! Det er så mørkt ute, og kaldt, det er meir enn -10 grader i kveld. Så eg har starta så smått med litt ekstra lys, både levande, på batteri og elektrisk. Eg gler meg til eg kan tenne adventslys kvar dag, eg gler meg til å henge opp stjerne, og sette fram lysstake og anna lys!
• lammerull og sylteflesk. Eg har kjøpt slagside av lam, og treng berre ein kveld (og motivasjon) til å krydre og sy. Heilt tett innpå jula skal eg lage tomatsild, og kanskje rømmesild?
• pepparkaker med blåmuggost og store skåler med klementin, det er advent altså! 
• Ta fram julepynten lille julaften, og pynte huset. Finne igjen kjent og kjær julepynt, henge den på riktig stad. Og gleda ved å rydde den vekk igjen i januar.
• julegåver er vel også ein del av advent. Ligg godt an, på ein måte, dårleg på andre. Nokre spør kva eg ønskjer meg, det er alltid vanskeleg! Eg har jo eigentleg alt, og samtidig blir eg så glad for gåver! Men når det kjem til julegåver, då er eg avhengig av lister! Og utkryssing etterkvart. 

Dette er jo gleder! Så kjem vasking og rydding, det er kjedeleg, men etterkvart innser eg at det høyrer med (og vaskegeneralen=mannen tillet ikkje slurv) 

No må eg berre halde ut november, men så bryt det laust! Hurra! 

Om eg er ein slag juleelskar? tja.