tirsdag 26. mars 2019

Mamma

Eg sa "ein gong til, please". Eg tenkte på skitur då, men no tenkjer eg på mamma.

Mamma døde i helga, og vi fekk vere saman med henne dei siste dagane, både pappa og vi søskena. Det var godt, midt i det triste!
Det er noko med foreldre, dei har alltid vore der, så når dei dør, blir det eit hol i livet!

1969

Så meir enn endå ein skitur, kunne eg ha ønska ein telefon til frå mamma, som byrja med at "det er ikkje noko eg vil" eller "du lagar kanskje middag no?" Eg kan ikkje ringe henne fleire gonger og fortelje at eg er vel heime etter lang biltur. Ikkje sende bilder og vente på telefon om at brøda mine ser så gode ut at ho nesten kjenner lukta.

Eg kan ikkje spørje om råd, for det gjer ein sjølv om ein er over 50 år. Eg kan ikkje sette meg med strikking, vise fram og få hjelp til å lese mønsteret. Eg tok meg i det idag, då eg gjekk forbi ein klesbutikk at "den genseren der ville mamma ha likt".
Mamma hadde "husmorskule" for meg i 2015, og eg lærte å
lage fiskekaker


Men eg tenkjer også på det å berre vere saman! Utan at det skal skje noko, spørjast om noko. Ete frukost når eg er på besøk, laga middag, prate om været. Det vi gjer med alle vi har rundt oss. Det kan eg ikkje lenger med mamma.

Mamma og pappa var velkomstkomite då vi
hadde over segla Hustadvika med båt.

Eg ser på bilder, frå mamma var ung, eg var lita, juleselskapet vi hadde sist jul. Og til meir eg ser, til meir huskar eg. Eg skriv på minneorda til kyrkja. Eg snakkar masse om mamma! Livet både går vidare og har stoppa litt opp no...

Mamma og meg (og bakhodet til onkel Kjetill?)
Ganske sikker på at mamma har sydd kleda mine.

Det er mange kapittel som blir lukka når ei mor dør. Heldigvis har eg mange gode minner!

onsdag 20. mars 2019

Appelsinmarmelade

Av og til tenkjer eg at det eller det kan eg lage. Oftast blir det med tanken. Men i går kjøpte eg økologisk appelsin, fann sitron i kjøleskapet (for det gløymte eg å kjøpe) og jammen hadde eg nok sukker, så då var det berre å sette i gang og koke appelsinmarmelade.


Eller berre .... appelsinen skulle vaskast og kuttast, litt kjedeleg. Men adskillege lettare enn sist, for mannen har kjøpt mykje betre knivar. Eg brukte oppskrifta frå sist, appelsinmarmelade, bortsett frå at eg denne gongen laga av 2 kilo appelsin. Det treng du ikkje gjere om du ikkje har veldig skarp kniv og mange du vil gje syltetøy til, for det vart riktig mange glass :)

Ferdig kutta!


Saktemat

Solskinn på eit glas!

Men sånn etterpå er det heilt i orden å ha laga masse appelsinmarmelade, godt å ha til påske. Den vart passe bitter, passe søt og passe stiv.

Og grovt brød med appelsinmarmelade er godt med te til kveldsmat!

tirsdag 19. mars 2019

Ein gong til? Please!

Som mor har eg fått spørsmålet, "Berre ein gong til? Vær så snill??? Berre ein altså!" Gjerne med verdas største og søtaste Bambiauger som følge. Det kan vere ein tur til i sklia, ein tur til med karusellen (med 30 minutt ventetid...) berre eit kapittel til frå Harry Potter-boka før leggetid (eg har lese ALLE sju bøkene høgt til kveldsmaten, det er ikkje få sider)

Nesten berre mine spor!






Eg tenkte det i dag då eg var i skogen. "Ein skitur til? Det må vere lov å spørre om ein til?" Eg prøvar å bruke opp ein del fleksitid på jobb, for fleksitid kan ein ikkje ta med dersom ein skulle finne på å bytte jobb, og det fører til skitur i sol og dagslys. Idag var det berre SÅ fint! Eg fekk lyst å sende bilder og film i alle kanalar, til alle som satt inne og jobba, alle som går på skule, alle. Eg prøvde å begrense meg, men er redd nokre syns eg ikkje begrensa meg nok.
Eg har ein favoritt-app på telefonene, særleg på vinteren, det er skisporet.no. Der kan du følge løypemaskinene i sanntid, og sjå kvar det er køyrt løype og kvar maskina er. Eg satt og fulgte med og la ei plan før eg stakk til skogs. Eg skulle først gå dit, så over der, tvers over den myra, rundt ved skyttarhuset, opp dit osv.


Overskrifter på nettet og i papiraviser er at "NÅ kommer våren". Då eg var ute i dag, tenkte eg "Ein skitur til, please?" (eller mange, var det vel eg tenkte) Det var så fint! Sola varma, det var nye spor, innimellom så nye at eg var den første som gjekk der, sola blinka i snøen utover myrene. Det var lite folk, om ein ser vekk får desse godt vaksne som ser ut som dei går veldig sakte, men som er umuleg å halde følge med, dei som berre kjører rett ned bakkane, og som er tilbake frå det innerste, øverste punktet i marka når eg spenner på meg skiene på parkeringsplassen. "Nei, det vart no ein tur i dag også", seier dei når eg spør. Det er dei samme som ser på meg og seier det er fint at også vi unge bruker marka. Eg likar dei!

Eg hadde ein så fin tur, eg vil ha fleire!


(Eg kan strekke meg til å seie at det er greit med vår rundt huset, kanskje kunne finne fram ein stol og sitte litt ute i sola med ein tekopp, kanskje ta i bruk bålpanna eg fekk til jul. Men i marka? Der vil eg ha nokre fleire skiturar!)

lørdag 16. mars 2019

Laurdagsfrukost

Det er noko med å vakne opp laurdag morgon, med det meste av helga framfor seg. Eg vakna før eg måtte idag, sto opp, fyra opp, sette på NRK Klassisk, laga meg te og las avisa til mannen sto opp.

Så vart det frukost for to. Med egg og laks og dill og paprika, kjeks med blåmuggost, quiz frå avisa. God tid! Godt selskap. Tid til å planlegge dagen.

Det blir nok bittesmå påskeliljer etterkvart.


Frukost for to.  I morgonsol!



Etterpå vart det bytur, for å bruke gåvekort vi fekk til 50årsdagene. Veldig artig å gå på Mammutsalg med gavekort når det var 50% ekstra avslag! Jada, vi har mange bøker frå før, men alltid plass til nokre til...trur eg.
Og etter det har vi vore på skitur, det var påskestemning og god glid ned bakken, både når vi gjekk opp og ned ...om du forstår?

Ein slik dag, det er akkurat kva eg treng etter denne veka! Det har vore spenning og mykje fundering denne veke. Eg har søkt fleire jobbar, og det er jo ganske spennande i seg sjøl. Eg har knapt skrive ein jobbsøknad sidan det var vanleg å skrive dei for hand! Sett opp CV? tja... Takk og pris for Google og andre gode hjelparar. Eg kom i mål før søknadsfristen. Men spenninga er jo ikkje over når søknaden er sendt, for korleis blir den mottatt!?
Heldigvis gjekk det berre ei veke, og så fekk eg innkalling til intervju. Oh du milde, skrekkblanda fryd frå morgon til kveld og litt når eg vakna på natta. Det var hurra for at eg faktisk er aktuell og hjelp fordi eg aldri, nokonsinne, har vore på jobbintervju. Så hei igjen til Google og til alle gode hjelparar som kunne svare og gje gode råd.  Men eg hadde høg puls i går, for dette var ut av komfortsona så det heldt. Ytre ting blir også ein ting, kva har ein på seg!? Det vart fin bukse og skjprte, og kloke sko. Eg hadde ein del planer utover dagen, for å avlede meg sjøl...frisørtimen vart riktig lang, for frisøren serverte te og sjokolade og sa at eg berre skulle ta meg god tid medan håret tørka!
Korleis intervjuet gjekk får vi ta når eg veit svaret, men eg trur eg kom greit frå det. Det er faktisk mange måtar å stille spørsmål på som er vanskeleg å førebu seg på, det er mange måtar å svare på også. Eg har brukt deler av natta til å tenkje på om eg vektla samarbeid for mykje og om eg sa litt for lite om andre ting.
Men uansett, helg akkurat no er veldig godt!

torsdag 14. mars 2019

Tulipan

Eg har kjøpt tulipanar idag. Fordi!



Fordi sola skein, det var skiføre, junior har fødselsdag. Fordi!
Treng ein eigentleg ein grunn til å kjøpe ein tulipanbukett?

onsdag 13. mars 2019

Mars

Mars, vårmånad, snømånad, junior sin fødselsdag, av og til er det påske i mars.

Eg tenkte å vise deg nokre marsbilder frå dei åra eg har blogga!

2012

Eg var heilt ny på bloggarenaen. Eg prøvde meg fram. Og det var påske.




2013

Eg markerte 8.mars med å skrive litt om fine damer i livet mitt.

Mamma og meg i 1969

2014

Mars kom med snø i mars, dette året også. Eg reflekterte over snø vi likar, feks med sol og påskefjell, og snø vi ikkje likar, på vegane i mars.



2015 

Det er marspåske, og pynten kom fram. Eg har mykje påskepynt!




2016

Tulipanar! Eg må kjøpe ein bukett til helga, trur eg.



2017

Snø altså! Det er så fint!



2018

Dette bildet er på ingen måte frå i fjor! Men eg blir så glad av å sjå det! Og i morgon fyller den minste av desse to 21 år!



Og dette er berre nokre få glint frå blogginga mi. Når eg såg tilbake, oppdaga eg mykje eg ikkje huska. Trur eg må ta eit tilbakeblikk i april også.

mandag 4. mars 2019

Fine ting på ein blåmåndag

Idag er det blåmåndag, og det er ikkje berre i kalenderen det står. Det er litt vel blått over det heile om dagen. Då er det lurt å sjå seg om etter nokre ting som er greit, tross alt! (og nei, ting blir ikkje betre av å leike Pollyanna, men eg må avlede meg sjølv litt)


  • det er lyst når eg skal på jobb om morgonen! Og endå meir magisk: lyst når eg kjem heim!
  • vaskemaskina jobbar og jobbar, eg treng berre putte klær inn og trykke start. (men det strykeskapet har eg ikkje kjøpt enno, så litt arbeid er det)
  • eg har fått god tilbakemelding frå språkvask på jobbsøknaden, no er det berre å jobbe vidare og krysse fingrane...
  • mannen er tålmodig og høyrer på meg, forstår når han skal vere einig og nikkar til det eg seier. Så kan vi heller diskutere litt når eg har fått ut frustrasjonane og er meir lydhør (eg trur iallfall at eg kjem dit, ikkje spør han om det)
  • eg bakte bollar til fastelavnssøndag, og det vart så mange at eg har frysaren full! Kanskje blir det bollar i matpakka i morgon?


Pollyanna? Ukjent for deg? Eg las om denne utruleg positive jenta i barndommen, men det kan vere at boka ikkje er så fengande lenger?? Ho leika "vere glad"-leiken og fann dei mest uante kilder til glede. 
Frå Wikipedia:
Pollyanna er en roman fra 1913 av Eleanor H. Porter som handler om en pike som etter sin fars død må flytte inn hos sin velstående og meget strenge tante. Gjennom sin optimisme og ukuelige tro på andre menneskers gode hensikter, får hun ikke bare sin bitre tante, men hele byen, til å «tine opp».

lørdag 2. mars 2019

Screenshot

Tek du screenshot? Og kva tek du i så fall av?

Eg såg nokon som hadde laga eit blogginnlegg om screenshot som ho hadde på telefonen. God ide, tenkte eg, og no har eg sett litt kva eg hadde liggande på telefonen. Alt kan ikkje delast, forsåvidt, men her er eit glimt!



 Dikt! Eg tek skjermbilder av dikt på Facebook og Instagram, for å ha til seinare!



Niese med fjøsvakt sendte bilde av ein freidig liten sjarmør på frifot!


 Sa eg dikt? Alltid plass til fleire. Dette var så fint at eg sendte det til mannen også.


Svoger har fått ny jobb og er intervjua av Teknisk Ukeblad.


Endå eit dikt, altså! Kan beskrive litt av livet, det diktet der!


Mange skjermdumper har handla om jobb. Om eg trur på alt...tja...


Junior var på ferie i Italia, det kom bilder av fjell og ski og snø og blå himmel (det regna i Trondheim denne perioden...)


Og eg var på framsida av Adresseavisa...

fredag 1. mars 2019

Skiføre!

Det kom snø. Det vart snø i marka. Det vart køyrt løyper.

Oh lukke!!!
Etter jobb var eg kjapt heimom, skifta, tok med ski og stakk i marka.


Ei humpete veke på jobb. Det har vore møter, diskusjonar, forvirring, sinne, godt kollegaskap og vanleg jobb. Det er slitsomt, men snart fell dommen. Det krever si kvinne å stå i dette. Men det er ikkje noko val akkurat no. Nokon andre vel for meg at eg må endre jobbkurs, heilt utan at eg blir spurt. Eg må henge på...eg les stillingsannonser, skriv søknader, lurer på om jobben kan bli redda i 12.time og kva vil eg då?


Nettopp no og difor er det GULL og GLEDE  å kunne spenne på seg skia! Gå. Motbakkar (eg hatar motbakkar, men det er dei som er best) gode spor og friske nedoverbakkar. Få opp pulsen, kjenne at eg blir sliten og blir svett. Å gå er terapi! Berre prøv!


Nysnø på trea, kan det bli finare??

Og etterpå vart det fredagskveld saman med mannen, god middag, god tid og lave skuldre.


«Tap for all del ikke lysten til å gå: jeg går meg til det daglige velbefinnende hver dag og går fra enhver sykdom; jeg har gått meg til mine beste tanker og jeg kjenner ingen tanke så tung at man ikke kan gå fra den.» 
Søren Kierkegaard