Vekestart veke 4

Av og til er livet fullt. Litt for fullt.
Det er slik akkurat no, og det er fullt av ting som ikkje høyrer heime på bloggen. Ting som angår meg, men ikkje deg. Fordi det er nokon andre sitt liv, som ikkje har bedt om å bli blogga. Slikt gjer hovudet mitt fullt.
Eg kjenner eg ikkje strekk til. Eg skulle vore fleire stader på ein gong, halde hender, gjort husarbeid, strekt meg litt lenger. Samtidig har eg eit liv, med familie og jobb her, så eg må leve med den strekken i livet.
Difor har det ikkje vorte så mykje blogging.

Heldigvis skjer det fine ting også, ting som gir energi. Helgetur. Feiring av pappa sin 87årsdag. Vennefest med overnatting på flatseng, og fin frukost med gjengen dagen etter. Og ikkje minst kaffe i gullkopp! Planlegging av venninnebesøk i februar. Feiring av niese sin 11årsdag, med mykje godtfolk og heimelaga sjokolademousse. Og eg er på surdeigskjøret igjen! Eg har arva surdeig frå kona til ein kollega av mannen, og gjer stadige forsøk. Har ikkje smakt på dagens produksjon, men havrebrødet ser godt ut! Heldigvis er det snart tid for kveldsmat! Å høyre junior vurdere og prøve ut ny bue til kontrabass. Eg let meg fasinere av musikkglede, interesse og fagkunnskap. Eg har kjøpt meg nye sko, når eg tenkjer etter har eg kjøpt fleire par. Der snakkar vi ting som bidreg til sinnets munterhet! Invitasjon til konfirmasjon. Og datoen for utsetting av båt kolliderar ikkje med konfirmasjonen!

Det kan sikkert virke som eg har så mykje på programmet, at det er difor eg blir strekt. Men du får tru meg når eg seier det er mykje mellom linjene her....

Med tanke på familiefreden, får du berre sjå
det ein paret med sko :) Dei andre er litt vagt omtala enno!

Eit dikt kan vi trenge på ein mandag som dette! Når livet dreg i alle endar, det regnar både tidleg og seint, vaskerommet er fullt, oppvaskmaskina jobbar overtid, og vegarbeidet i gata gjer at yttergangen er full av leire. Ein måndag det var litt tungt å stå opp, men det var fordi eg sov lite på grunn av vennefest. Kjøleskapet var ganske tomt, men eg har butikkar i nærleiken og pengar på kontoen, og ein mann å ete middag saman med. Så det blir eit kjærleiksdikt, eller kanskje er det eit vennskapsdikt? Om å halde kvarandre, støtte kvarandre i det som er livet. (eg har delt dette diktet før, men eg syns det er så fint, så du får det igjen!)

Jeg holder ditt hode

Jeg holder ditt hode

i mine hender, som du holder

mitt hjerte i din ømhet

slik allting holder og blir

holdt av noe annet enn seg selv

Slik havet løfter en sten

til sine strender, slik treet

holder høstens modne frukter, slik

kloden løftes gjennom kloders rom

Slik holdes vi begge av noe og løftes

dit gåte holder gåte i sin hånd

Stein Mehren

Ha ei god veke! Plutseleg så bloggar eg igjen.

Vekestart veke 2

Det er visst onsdag allereie.
Før idag var eg værsjuk, det var regn i lufta, +6 gr og ikkje mykje teikn til januar og vinter. Men no er det litt betre, det snør tett ute, eg kryssar fingrane for at det blir litt kuldegrader, slik at snøen litt meir enn til i morgon. Og eg tenkjer litt på klima og klimaendringar, det blir ikkje mindre når eg høyrer om varmerekordar i mengder i 2016 og ekstremværvarsel for Vestlandet i morgon. (Eg lurer av og til på det med ekstremvær, for før var det også dårleg vær, men eg kan ikkje huska at det kom ekstremvarsel? Er det feil, eller var eg berre lite interessert i været då eg var yngre? Eg budde iallfall ein kommune også kjent som "verdens beste kommune for naturglade", der fleire vegar stadig var stengte på grunn av snøfall og rasfare. Det var upraktisk og farleg, og det vart jobba mykje for å betre vegane. Noko har dei fått gjort, men no er det jordras og ikkje snø som er problemet, og det er nye problem! Oj, litt ute på viddene, kjenner eg. Men eg funderer på dette med klimaendringar, og kva eg kan gjere, uansett!)

Av meir nærliggande ting, kan eg nemne at adventsdukane no er vaska og heng på stativet. Når dei er tørre, skal dei rullast fint saman og leggast i skuffa fram til slutten av november.

Til jul i 2015 kjøpte eg ein asalea. I heile fjor passa eg den trufast, og den fekk vatn jamnt. I premie blomstra den frå februar til november! Eg har igrunnen tenkt at den var ferdig no, men jammen ser eg noko som minner om knoppar på den. Stolt sa du? Her er det hashtag #grønnefingrar #hobbygartnar #stoltgartnar #blomsterpike +++

Ute jobbar dei. Det blir visst ny vassledning og ny kloakk. Om ei stund. Det er djupe grøfter i gata vår, vi ser tydeleg at vi ikkje bur på steingrunn, derimot bur vi på blåleire. Den siste veka har vi ikkje kunne parkere hos oss sjølv, vi har parkert i gata og hos gode naboar. Eg har prata (med det eg håpar er fagleg tyngde og interesse) med anleggsarbeidarane, om graving og rørledningar og arbeidskår når eg vassar i gjørme, is og søle til og frå huset. Det blir sikkert bra til slutt, men det er "litt" kaotisk undervegs. Det er nok ikkje så enkelt for anleggsarbeidarane heller.

På ein litt grå onsdag, med rart januarvær og leire langt inn i huset etter all graving, treng vi alle eit dikt av Hans Børli:

PÅ STIEN EN MORGEN
Det knaser sprøtt i kongler under støvlene mine,
jeg går her halvt fraværende
med hodet fullt av blå lang-tanker
mens alt er hverdag
og ting av fortrolighet rundt meg.
Ei barnål i ene sokken min
vekker meg med et iltert stikk
- Dette er livet ditt! Her går du
midt i det,
- så lev for pokker,
plukk de gylne solsekundene
opp i den slitte gamle neverskrukka,
hjertet ditt.

Jeg stanser,
står fortumlet på stien
og snyter meg i en flik av morgenrøden

Hans Børli

Barnåler i strømpene er ikkje så uvanleg no etter jul. Det er blå tankar. Alt eg ikkje rekk, eller orkar (sjølv om adventsdukane er vaska no) fyller hodet.
Men det har vore nokre fine solopp- og nedgangar i det siste. Det gjeld berre å få dei med seg. Eg er igang med trening etter jul og forkjøling, det er bra! Vi et mykje grønsaker, rutinene fell på plass igjen. Og så får vi drømme litt tilbake til sommaren og håpe vi får ein fin sommar igjen, om nokre månader.

Laurdag

Eg er ein stor tilhengar av helg! Eg hadde nok ikkje sett pris på berre helg, men vekslinga kvardag/helg er fin.
Idag hadde eg ingen planer, men jammen har eg klart å fylle dagen lell. Først var det frukost. Lenge! Tekanne med julete, aviser, kryssord, ein havrekjeks med edamerost til frukostdessert. Klementin.
Etterpå vart det bytur. Eg hadde ingen konkrete planer med kva eg skulle, berre kikke litt på salg for å sjå om eg fann noko eg ikkje viste eg trong. Rolegare i byen no enn rett før jul, heldigvis! Då er det så fullt at eg får litt klaustrofobi, og stikk heim at så fort eg kan. Etter ei stund fann eg ein kafe, drakk te, åt lunsj og las avis. Fekk sms frå ein kollega på bytur, og det vart spontant treff på kafe. Så triveleg! Etterpå fann eg sko, fornuftige pensko med lav hæl. Eg har ei stund vore bekymra for at eg har mista litt grepet på skokjøp, for eg har nesten ikkje kjøpt sko på lenge. Før var eg meir impulsiv på den fronten. Men det viste seg at det handlar om å finne dei rette skoa. I tillegg fann eg ein lett genser i ull, som eg også har vore på leit etter.

Lunt inne medan snøen regnar bort

Vel heime vart det middagskoking, til junior og meg, mannen er borte i helga. Kylling fyllt med edamerost og surra i bacon, og grønsaker som fekk steike med i panna. Masse smak!
Eg har bakt kake til kyrkjekaffe i morgon, og noko eg skal ha med som gåve på ettermiddagsbesøk. Eg har prøvesmakt litt, saman med ei ny kanne med julete. I kjellaren har junior "jam" med musikkompisar, og eg høyrer musikk medan eg bloggar.

Kjem på at eg skulle vaske klær i dag, alle adventsdukane ligg i kjellaren, klar til vask. Der blir dei nok liggande til måndag! Det er jo lenge til advent? Kassene med nedpakka julepynt blir ikkje sett på loftet før måndag, det kan jo vere at eg finn noko eg har oversåg då eg rydda i går? Eg hadde ei lita opptelling på englar, eg ga meg med telling på 75 stk, det er mange fleire... Slik gr det når ein har samla i alle år!

Resten av kvelden går nok med til samme travle program som resten av dagen! Har du hatt ein fin laurdag?

Fridag

Idag er det fridag. Ute er det -11 og eg bær ved og fyrer. Eg angra litt på ein tidleg avtalen med fysioterapeuten, opp og ut var ikkje det som sto først på ønskelista då eg låg under den varme dyna idag tidleg... Men no er eg ferdig bretta, strekt og knadd, og resten av dagen min!

Det ser ut til å bli ein passe lat dag, og det er godt det også. Klesvask, rydding i kjøleskapet, avislesing og fundering på kva eg skal gjere med juletreet. Det lever på velvilje frå dag til dag akkurat no, kjempefint, men det tar plass. Meir te, snart omelettlunsj, bære meir ved.

Ikkje så lett å sjå, men det er eit stort hol i gata.
Dagens(og dei siste vekene si) underhaldning er gravemaskin
rett utanfor stoveglaset.

Kald dag, varm te! Restar frå jul passar godt i januar.

Vinterstemning ut kjøkkenvinduet.

Julegodt-restar i juleraud arveskål.

Sofaselfie i januarsol.

Juleduk, julekopp med julete.

Januargleder

Januar er igang. Kvardagen er her. Idag har vi ete asiatiske fiskekaker med agurk- og raudlauksalat til. På tide med noko lettare enn kjøt i alle variantar! (fiskekakene laga eg sjølv, og bortsett frå at dei vart altfor salte, var dei eit friskt innslag på middagsbordet!) Det er fint med kvardag. Eg var klar for grovbrød og gulrot, sjølv om eg syns det er litt langt mellom måltida...
Men det er litt tungt å komme igang igjen, etter lefser til frukostdessert og sjokolade og kaker som mellommåltid, mellom alle måltid faktisk! Eg kan fint leve med å snu døgnet....det er berre at eg ikkje likar å snu det tilbake. Klokka halv sju om morgonene er det mørkt, det er kaldt, og eg er trøytt! Eg treng å tenkje på noko positivt!!! (ikkje berre kl halv sju, forresten)

Men tross midtvinter, solnedgangen er fin!

• vi hadde ei fin jul! Rett nok var vi delvis sjuke og fekk ikkje gjort alt vi hadde tenkt, men vi var saman, vi åt godt, spela spel, såg filmar, las bøker og åt sjokolade. Vi traff vener og feira nyttår.
• eg har jobb å gå til, der eg får jobbe med interessante ting og der eg får tilrettelagte oppgåver. Det er fint for både hørsel og rygg, og dermed for humøret. Gode kollegarer har eg og!
• det har kome snø! Akkurat no er det som eit julekort, forsinka som så mange julekort er. Igår var eg på årets/sesongens første skitur. Eg trur knapt eg gjekk på ski ifjor vinter, så gleda var stor i går. Og jada, eg gjekk sakte, men kort, nytte skogens ro, og likevel syns vel ryggen det vart litt mykje.
• juletreet veks og veks. Det er grønt og frodig og har fått nye, lange skot. Koseleg å sjå på, det er jo lyst med eit tre på stova. Samtidig gler eg meg til å ta bort julepynten, det blir på ein vårleg og god plass når treet er ute! Det er jo ille å kaste ut eit tre i vekst, kanskje eg kan prøve å selge det? Pent brukt, billeg i drift, lettstelt? Interessert?
  
• julesnop på salg! Say no more... ;) Prøvar å begrense meg, men litt må eg kjøpe.

  

  Mokkabønner er min favoritt!

• Ein amaryllis som snart blomstrar!

  

  Og ny juleduk, brodert av mamma, julegåve. Jazzboka fekk mannen
  av den mest musikkinteresserte junioren.

• planer i helgene i heile januar! Kaffebesøk, nyttårsbord, fødselsdagsfeiring, jubileum og fleire turar! Det er stadig noko å sjå fram mot! (og kanskje greit at det inntil vidare ser ut til at februar bli litt roleg?)
• kakeboksar som tømmest! Det er fordelen med å bake lite...fortare tomt. Eg var veldig gnien på kakene før jul, elles hadde det vel vore tomt før! 
  
• Det går mot lysare tider!! Hurra! Idag har det vore klarvær. Sol. Og iskaldt, men det er jo vinter, så det skal jo vere kaldt. 

Og eit oppstartsdikt i januar, det må vi ha. Eit forsiktig dikt, som kjem og tek deg i handa og seier at  "Det skal nok gå".

Dagens ord er vart

og varsamt

og går stilt i døra

der det kjem listande

med lyset

og kviskrar:

Det skal nok gå.

Me tek eit andegrag

i lag.

Helge Torvund

Ha ein fin kveld!

No skal eg gå ein tur, medan mannen prøver å synkronisere dei elektroniske kalenderane våre. Det blir nok bra, men eg stiller meg tvilande til at det er sunt for blodtrykket undervegs...

Skitur. Obligatorisk bilde av skituppar.