Ny sesong

Båten er på fjorden!

Det er så godt når akkurat båtutsettet er over. Det er ein skummel dag, syns eg. Er alt i orden? Vil den flyte? Er båten tett etter vinteren? Vil motoren starte? Eit utall spørsmål! Og eg kan ikkje gjere noko med noko!

Totalt ubrukeleg admiral, men veldig
dekorativ da!

Lekk båt? Tja, den ville gått rett ned om eg hadde ansvaret. Motor som ikkje starter? Vi ville blitt liggande ved kai... Etc!

Hurra for mannen som held hodet kaldt og som kan fikse evt feil. Det var ingen feil! Båten var tett, motoren starta på første forsøk og vi fekk opp segla. Og vi var vener gjennom heile prosessen! (eg eg seier ingenting om korleis andre par oppførte seg)

Båten har funne plassen sin!

No ligg båten på plassen sin, og med litt tilvenning, er eg nok klar for segling igjen eg og. Først skal det vaskast og ryddast og flyttast inn!

Takk for turen!

Idag var eg i skogen, og såg etter skiløypene. Det kunne jo vere at det var nok snø til ski?! Men eg var såpass realistisk at eg hadde ikkje med meg ski.
Ei veke med 20 varmegrader og sol hadde virka. Det var stort sett bart, berre litt slush-aktig snø og tett med kvistar og barnåler...
Det var supert å gå, med terrengsko og gåstavar. Ingen fare for ikkje å bli svett i motbakkane på den måten heller.

Motbakkesliten. Uten ski.

Det er fint med ski i mørkret også 

Solskinn eller snøvær, fint på kvar sin måte 

Men det er litt vedmodig! Eg har hatt så mange, fine, gode skiturar i vinter. Eg har tenkt lange tankar, gått av meg frustrasjonar, gått av meg jobbutfordringar(det har vore mange skiturar med det som årsak i vinter) eg har sett naturen, høyrt på skogens ro og kjent den krype inn i meg. Eg har gått meg svett, angra på at eg valgte den lengste runden, jubla når eg har gjort unna dei verste motbakkane, gledd meg over nedoverbakkane(nesten kvar gong) Sendt gode tankar til dei som rydder løyper og køyrer spor, det er lite som er meir luksus enn å legge ut på tur i nye spor -særleg når eg er førstemann. Eg har gledd meg over at eg slo til og kjøpte felleski hausten 2017, det har gjort skilivet mykje lettare.

Her gjekk eg på ski for 8 dagar sidan...

No er vinteren over! Eg tenkjer at det kjem kanskje ein vinter til, med snø og kulde, også i år. Sjøl om det er vanskeleg å sjå for seg der eg gjekk i våt myr eller mellom kvitveistuene i skogen idag. Men uansett er nok skisesongen over. Så takk for turen! Vinteren er god å ha!

Påska 2019

Drømmepåske, står det i overskriftene. Og det stemmer, på eit vis. Været og temperaturane var fine, men vil vi ha 23 gr i april, nå vi tenkjer på klimaendringar og slikt? Eg kjenner på både/og i dette været...

Men altså, eg er dobbeltmoralsk så det held, og sitt gjerne ute i sola og kjenner på varmen. Med litt ubehag i magen...

Skal vi sjå kva eg gjorde, i eit utval? Eit velfrisert utval, med stort sett sol, glade miner og mykje mat! Vit at ikkje alt vises på sosiale medier, slik også med mi påske!

Bytur. Nidelven og Nidarosdomen.

Heimelaga påskepynt,
klipt av svigermor

Romsdalen hadde meir vår enn Trondheim.
Det var kvitveis i alle skråningar

Fjord og fjell.
Eg hadde med ski, men brukte dei ikkje.
Andre i familien sprang frå topp til topp,
på tung og våt snø. Kvar si lyst!

Kveldssol sett frå stova.

Litt seinare på kvelden

Heime! Det trygge fjellet, fjøs og uthus.
Barndommens trygge hamn

Den beste utsikta å kvile augene på!

Har vi familieselskap, tøysar vi ikkje med kakebordet!

For å snakke sant, må eg vise eit bilde av gråværet også.

Og slik såg det ut då vi hadde pakka i bilen og skulle
bruke 5 timar i bil...

Og vel heime rakk vi nyte litt påskestemning,
med påskelikjer frå svigermor og ein gammal
duk, arva via via frå beatemor.

Vi har kjørt mykje bil, vi har ete godt, vi har sove godt, eg rakk å lese litt krim.
Vi har møtt familie, vi har drukke brus i solveggen. Pappa (89) kunne kaste skjorta og sole seg. Vi har vore i stort familieselskap, kjent på det gode i å treffast, og det triste i at mamma ikkje var der. Vi har feira svoger, spela spel og sett bilder. Nokon har gått på ski, eg har ikkej gjort det, men fått gnagsår likevel. Vi har tatt bilder, av sol og familie og natur og regn. Vi har diskutert og prata tøv. Det var egg og bacon til frukost og lam til middag fleire dagar. Det vart nok kaker og potetgull og marsipan.

Kanskje på grunn av alt på jobb, varte påska lenge nok til at eg gledde meg til å komme tilbake på jobb og treffe kollegaer. Eg skal snart oppdatere deg på jobbjakt. Snart. Først skal eg finne ut kva som er passe måte å svette på no når det ikkje er skiføre lenger...

Den stille uke

Vi er midt i "den stille uke".

Den stille uke er uka fra palmesøndag til påskeaften. Navnet kommer av at man tidligere ikke ringte med kirkeklokkene denne uka, og heller ikke brukte orgelet under gudstjenestene. I denne tiden skulle man i størst mulig grad la alt arbeid hvile, og det skulle være stille både ute og inne. https://snl.no/den_stille_uke

Den er forsåvidt stille her hos oss også, for vi har hatt fri frå jobb, nabolaget er stillare enn vanleg, mange er borte, det er lite trafikk. Det har vore sol og varme, vi har testa ut bålpanna og vi har ete middag i solveggen.

På den andre sida har vi gjort mykje, dagane går unna. Mannen og ein son har brukt mykje tid på båten, og dersom dei snakkar sant, er det trygt å sette den på sjøen neste veke. Mannen fekk lit ekstrajobb fordi pc´n eksploderte(eller kva det var som skjedde, den virkar ikkje) Eg har rydda og vaska og bakt og innimellom lurt meg til litt krim i solveggen. Igår var eg på ski!! Lykke altså, med skitur i sol og 10 plussgrader. Nykjørte spor og skogen så godt som for meg sjøl! Dei andre med skidilla er truleg på fjellet.

Vi har hatt tid til lange frukostar, med egg og te og kaffe og aviser og Påskelabyrinten i bakgrunn. Det har vore godt med fridagar, sjøl om fridagar også er dagar med mykje program.

Skål frå mamma

Påskepynt
(og livet er ikkje alltid det vi ser på SoME,
resten av huset er ikkje pynta...)

Egg Benedict til frukost

Og så har dagen idag vore ein vemodig dag med mange minner. Idag ville mamma fyllt 83 år, og det er den første merkedagen etter at ho døydde. Så eg har vore i skapet og funne ting eg har fått av henne, ei raud skål til å ha kjeks i, påskeduken ho sydde til meg og slikt.

 

Det går nok bra

Den eine sonen ringer meg på butikken og spør om eg kan kjøpe med ruccolasalat. Han treng det til pizzaen han lagar, den med spekeskinke.

Den andre ringer for å spørre om kor mykje lammelår ein treng til 12 personar.

Gutta kan lage mat! Det går nok bra, dette.

April

April er her, kva har skjedd på bloggen i april tidlegare? Det er naturlegvis berre ein lite glimt, men eg har plukka ut eit aprilbilde frå kvart år eg har blogga.

2012

Eg sette rett og slett saman ein påskecollage dette året. Det var snø og egg og krokus, ser eg.


2013

Påskefjellet mitt!
Vi var på det som er det ekte påskefjellet og det var masse nysnø og nye spor. Den gongen var eg ikkje riktig like vill etter skitur som no, men alle vil vel gå på ski her?


2014

Eg var ein snartur i København i april dette året, og desse karane kom forbi då eg gjekk på jakt etter nye sko.
(som alltid i Køben)

2015

Det er ofte påske i april. Vi har ofte vore i Romsdalen. Også i 2015.
Her er mamma sine påskeblomter!

2016

Eg opererte ryggen, for 3.gong. Eg måtte ha litt hjelp første dagen.
Eg måtte ha rullator... Heldigvis vart det med den eine dagen.
No er det snart 3 år sidan. Eg held ryggen nokså i sjakk, med fysioterapi, trening, skitur, variasjon i arbeidet. Eg er litt spent på hausten...

2017

Sjølvaste hytta på påskefjellet!
Litt lite snø, men eg trur vi gjekk på ski. Berre på dagstur, fint lell.
Gode minner frå mange påsker!

2018

"Det kjem alltid ein vinter til", brukte ein kjenning å seie.
Det gjorde det i april i fjor også. Det kan vel skje i år også...

Måndag

Det er måndag. Sol ute, men kaldt. Eg måtte ein uplanlagt tur på butikken, og det er heilt klart gåvær! Eg tenkte at idag, idag skal eg sanneleg bake brød, eg har jo fri og allting, og bakar eg brød, slepp eg på butikken og då unngår eg impulshandling. Eg sette igang, det var berre det at eg mangla gjær... så det var tur på butikken og det vart litt imulshandel i tillegg til gjær. Og det vart gåtur i aprilsol og aprilvind.

HVIS DU VIL

Har du varme
nok?
Du har.
Søvnen, tankene
er gitt deg gratis.
Men varmen i deg
må du gi
og gi igjen.

Også du kan si et ord om glede.
Du har en hånd
varm,
hvis du vil.

Rolf Jacobsen

Og takk for alle gode helsingar og tankar og klemmar etter forrige innlegg. Kvardagen går sin gang, eg forstår enno ikkje heilt. Min mest trufast blogglesar er borte, mamma heldt seg alltid opptatert på bloggen og etterlyste gjerne nye postar!