Haust

Hausten er mange ting.

Dei klaraste dagane med sol frå skyfri himmel.
Dei gråaste dagane med regn og eit så kaldt drag i lufta som du ikkje har kjent sidan tidleg på våren.
Dagar då det passar å ta fram eit tjukt skjerf og vottar på veg til jobb.
Dagar då det å sykle gir naglebit til langt utpå dagen.
Dagar der ein frys fordi ein trudde på værvrselet og ikkje tok ulljakke.
Dagar då ein har altfor mykje klær på, fordi ein trudde på værvarselet og tok ulljakke.
Tyttebær i skogen. Mange, raude skattar som kan bli syltetøy eller trollkrem. Har du smakt trollkrem med heilt modne tyttebær, rik på smak av haust og for min del barndom? Bortsett frå at eg likar trollkrem betre no enn eg gjorde då.
Sopptur saman med mannen. Eller, tur saman med mannen, han plukkar sopp og eg går ein ekstra runde og finn litt bær.

Haustfarger på trea og lyngen i skogen. Og på hekken rundt huset. Lauv som fell på plena (og hageblomster som skulle vore rydda bort og kjøkkenhage som skulle vore klargjort for vinteren)
Butikken full av norske epler og masse rotgrønsaker! Eg får lyst å berre kjøpe pga fargene og luktene! Og bake opp eplekake på eplekake, bake rødbeter og ete med fetaost... Brokkoli bakt med salt og chili. Fårikål. Grønsakssuppe. Nam!

Å vakne på morgonen og høyre regnet tromme på ruta, og prøve å huske om det er tirsdag eller laurdag.
Drikke tekopp etter tekopp og brenne lys og lese bok.
Den første dagen med vedfyring. Lukta av bjørkeved, og roa i å sjå på flammane i omnen. Vi hadde den i helga. Og vi har bua full av ved, så det skal bli fleire helgemorgonar der eg fyrar opp og et frukost i sofaen medan eg høyrer på NRK Klassisk og les avis.

Det var det, ferien er over

I ferien har vi gjort mykje, så mykje at eg neste år har tenkt å gjere mindre!

• båttur (neste år skal eg legge inne inn båttur på slutten av ferien, for å roe ned)

  

  Ikkje så avslappa heller, når vi skal under bruer, det ser aldri ut som det vil gå bra!

• bilturar (stadig vekk, både kort og langt)

  

  Eksempel på mål for biltur. Utsikt hos mine foreldre.

• vore i 50årsdag til venninne, og fekk kombinert med besøk hos svigerinne og hos studiekompis av mannen, og ein begravelse. 
• førebudd, gjennomført og evaluert dobbel femtiårsfeiring for meg og mannen. Fornøgd med festen, med turen dagen etter(vi hadde valgfri topptur eller tur til hytta dagen etter) og alle gjestane som kunne vere med! Det vart nok mat, nok kaker, nok program. Vi hadde quiz og vart overraska med kahoot. Vi hadde bilder frå 50 år. Vi hadde ikkje minst ein kjellar med mange spel som dei yngste gjestane brukte flitting. Vi hadde nieser og nevøar og soner som hjalp til, og vips hadde vi rydda og vaska alt. Feiring er så bra!

  

  Og kjolen er mamma sin. Kjøpt til bryllupet til søstra mi i 1980
  Passa perfekt til meg no! Og alle trudde eg hadde ny kjole.

• eg har vore på Hytta, barndommens paradis, ein dag. Vi tok ut båt, og eg har sett gleda i å få ro hos nieser og nevøar og fått besøk av sauer og drikke skikkeleg kokekaffe på plena. Eg har ete årets første blåbær og gått tur med niese, som hadde mykje å fortelje. Det er ikkje så verst å bli godkjent som fortruleg tilhøyrar.

  

  Dette! Dette gir ro i sjela og påfyll til batteri og lavare skuldre.
  #mykindofmindfullness

• vi har besøkt familie, og hatt besøk. Vi la beslag på campingvogna hos mamma og pappa, det var litt som ein ferie å bu litt tett og trang og med litt mange ting, og vere så nært naturen! Sjølv om vi låg rett utanfor husveggen.
• vi har vore i Sverige på harrytur, som i tillegg til handel, inneheldt natt på hotell og fin middag, rusletur i Åre sentrum og ein tur i turløypene. 

  

  Åre gamle kyrkje

• eg har trena litt for lite, men har ete veldig mykje god mat!

  

  Mateksempel. Sveler med smørkrem på fergetur.
  #ferdamat
  SÅ godt! Og absolutt feriemat.

• eg har vore med på opning av tursti rundt vatnet i barndommens rike. Eg var saman med pappa, han fekk litt skyss, eg fekk gå. Det var skodde og småregn, men god stemning, mykje folk! Eg traff nokon eg nesten kjenner, men aldri har møtt før, slik er livet i sosiale medier!

  

  Pappa på turstien har har hatt ide til, vore med og planlagt og laga.

• vi har fått båten opp på land, og konstatert at det litt brå møtet med ein litt høg havbotn ikkje hadde gitt så mykje skade som frykta, og i morgon skal båten ut igjen og det er håp om små turar, sjøl om det er kvardag og jobb. Det er tross alt juli enno, og mange fine kveldar framover! 
• brukt litt tid på å venne meg til at ingeniørstudenten er vaksen, og reiser på ferie og er utanfor dekning og på ukjente fjelltoppar og utan noko reiserute han kan gjere rede for før etterpå. Eg syns eg har takla det bra. Uvisst kva ingeniørstudenten meiner, men eg har iallfall ikkje ringt han mykje.
• Eg har hatt ein litt lang dagstur, der eg fekk med meg konsert med musikkjunior på moldejazz, lunsj saman med både musikkjunior og ingeniørstudenten, og fekk med kontrabass heim igjen. Så leverte eg ingeniørstudenten til sommarjobb hos besteforeldre og køyrte heim i sein julikveld med sol og regn og P2 på radioen. Og ei korg jordbær som var tom då eg kom fram!
  
• Og innimellom alt, har vi faktisk hatt nokre dagar heime der vi sov i eiga seng, gjekk i marka, grilla middag og førebudde feiring(det sørga mitt indre stress for, det er så mykje som kan gjerast før ein slik dag) Lurer på om vi ikkje hadde ein dag der vi var innom byen og slentra rundt ein times tid også? 

Eg har sikkert gjort mange fleire ting! Men det får kome etterkvart, om eg huskar dei. Det har vore ein fin ferie, og den har gått fort.
Eg har ikkje prioritert blogging! Eg har lese litt kva andre har skrive, men det er vel eit godt teikn at ikkje alt er som i kvardagen? Og eg har delt ein del på snap og instagram, så heilt borte frå SoMe har eg ikkje vore. Det skulle tatt seg ut...

Frå kjøkkenhagen

No er det søndag kveld, eg har betalt rekningar, rydda i papir på pulten, flytta pengar til rett konto, tenkt på matpakke til i morgon, planlagt å leite etter bringebær til syltetøy og plukka 7 modne jordbær i hagen. Eg har rydda i bilder på telefon og data og tenkjer, som så ofte før, at eg skal bli meir organisert og i forkant... Eg har pakka ut frå overnattingstur og harryhandel, vi har sett på gåvene vi fekk til 50årsdagen og byrja planlegge neste feiring. Blir nok ikkje kjedeleg resten av året heller.

Veke 26 / høgdepunkt

Eg trur eg held meg til høgdepunkt denne veka.
Og eg vel to høgdepunkt, som begge var i helga.

Vi skulle til Romsdalen, og det var St.hansaften på laurdag. Ein dag for bål og grilling. Eg såg på værmeldinga, og den lova både regn og vind og lave temperaturar. Mannen snakka stadig om grilling og bål i fjøra. Kona var skeptisk! Vi køyrde frå Trondheim i pøsregn, det var kaldt og det var nysnø langt ned i fjella vi køyrde forbi. Laurdag kom, det var stadig fare for sol, det regna ikkje og det var ikkje så kaldt som lova. Det vart bål! Og grilling. God mat, triveleg selskap, ein skikkeleg midtsommarkveld!

St.hansbål

På søndag feira vi storebror sin 60årsdag. Det var nok ein fin dag, med god mat og triveleg selskap. Eg traff mange eg sjeldan ser, og som alltid, det er godt å ha familie!

Og her er eg og bror, for ca 49 år sidan. Ein storebror som passa på!

Veke 15

Dette var veka då våren kom! Like rart kvart år. Det går frå kuldegrader på natta og snø over heile plena til varme og sol og krokus og den første lunsjen på terrassen! Jippi for årstidene. Eg syns vinteren har vore super, men eg elskar våren også.

På måndag kjøpte vi nye fjellski til meg! Hurra! Kanskje rekk eg bruke dei før snøen forsvinn?
Gler meg til å bruke dei, sjøl om det kanskje ikkje blir denne sesongen.

Tirsdag, sol og småsko. Sjøl om eg likar ki og snø, er dette eit høgdepunkt kvart år.
Det kjennes som å fly! Akkurat her var det ikkje is heller, hehe.

Onsdagen tok meg frå bar asfalt til skitur. Seint på ettermiddagen, med full sol!
Det var fint, og føret var varierande, frå is i sporet til slush

Torsdag var det sceneskifte igjen. Årets varmaste dag, til då, var perfekt til båtpuss,
skifte av sinkanode på propellen og anna forefallande arbeid. Vi rakk å bli ferdige
til felles båtutsett i år også.

Fredag bakte eg fylte horn til dei som skulle sette ut båt på laurdag, og
litt til middag på fredag kveld. 

Laurdag var eg på familiedag på Sund folkehøgskole.
Her er utsikta frå øverommet til junior. den er slett ikkje ille!
Det var musikk og sang og latter og talar og informasjon fra alle
dei ulike linjene. Og god mat.

Søndag kome med sol og varme, og litt tid innimellom til å nyte dagen på
terrassen. Te og lesestoff og snø som smelta slik at vi nesten kunne
sjå korleis den krympa!

Veke 9

Sist veke var ganske travel, slik eg huskar den. Det var musikarar og studentar innom, og ut igjen. Utlån av bil. Glede og ødelagte håp i samme rom. Fullt hus. Liv til langt på natt, og frå tidleg morgon. Eg var på jobb. Iskaldt ute. Vinter. Helgetur. Vises noko av dette i bilda eg tok?

På måndag laga eg ei stor gryte chili con carne, og etterkvart som huset fyltes av gjestar, hadde eg i meir bønner! Utmerka måte å drøye maten på #husmortriks Studentane sette pris på maten, det var fullt rundt spisebordet og eg gledde meg over livet i heimen (og syns det er godt når det roar seg igjen)

Tirsdag morgon på jobb. Petriskålene er klare til avlesning. Av og til kjennes jobben ut som ein rebus utan kjent svar, andre gonger er det meir rett fram. Uansett ei oppgåve som krever at ein er vak frå morgonen av! Og ordtaket "bedre og bedre dag for dag" gjeld absolutt her. Dette er livslang læring.

Onsdag og venteselfie på jobb.  3 minutt er ikkje lenge, iallfall ikkje lenge nok til å gå og gjere noko anna, men lenge nok til at ein kan leike seg med mobilkamera! (eg har tatt menge selfiar i det siste,  kanskje det må delast?)

Kontorutsikt. Gnistrande kaldt, iallfall til Trondheim å vere. På det meste nesten minus 17. Men når ein sitt inne og ser på sola, så kjem vårkjensla!

På fredag var vi komne til Romsdalen. Her er mitt favorittfjell i kveldsol, men sett frå ein litt annan vinkel enn vanleg. Blir litt poetisk av slike fjell, og byrjar sitere dikt inni meg, "Dei gamle fjell i syningom" , "No ser  eg atter slike fjell" etc.

Laurdag bakte eg ei slags Mor Monsen-kake. Eg bakar skuffekaker så sjeldan at det avgjort bør visast fram på bloggen! Og bakaren har førsteretten til smaksprøve, som du ser... Det vart såpass vellukka at eg vurderer ei reprise på eige kjøkken! (Eg laga kjøttkaker også, dei vart godkjent av pappa, og eg tek i mot husmorpoeng om du deler ut!)

På søndag og på heimveg igjen. Eg har mobiltelefonen full av bilder av fjell etter denne helga. Eg gjekk ikkje ein einaste tur på fjell, men eg såg dei rundt meg på alle kantar, og dei var så fine! Det kan bli ein bloggpost med berre fjellbilder etterkvart!

Grunnen til at vi var heime, var begravelsen til ein onkel. Det var ein fin dag, midt oppi alt. Han var glad i fjell, turar og særleg å fiske. Ein av sangane var "Har du fyr", og den er så fin at eg må dele den med deg her og no.  Lytt og nyt! 

Veke 7

Februar går sin gang. Denne veka er det visst vinterferie rundt om, men ikkje for meg. Det er forsåvidt heilt greit. Ikkje var det vinterferie sist veke heller, men kva gjorde eg på? Her kjem nokre utvalgte øyeblikk.

Måndag. Då er det godt å kvile augene langt borte. Dette er utsikta frå kontoret mitt. Det er fasinerande å sjå korleis alt endrar seg med været og årstidene. Kanskje ikkje så godt å sjå her, men langt der borte er ei stripe med sol!

No kan det verke som alt eg gjer på jobb, er å sjå ut...  men dette er altså utsikt frå eit anna rom på jobb. Det er nesten som eit innramma bilde?! På tirsdag såg eg ut på den klare himmelen og røyken frå ei pipe.

Onsdag var det valentinsdagen. Mannen var i Oslo det meste av dagen, men han kom heim til meg før dagen var omme!

Torsdag gjekk eg til jobb, og fekk med meg denne soloppgangen!

Fredag hadde eg fri, men fullt program. Då vi kom heim seint på kvelden hadde det byrja å snø. Det var så stille som det kan bli i ein by ein fredagskveld. Lydane var dempa av snøen, alt var kvitt og mjukt. Eg kunne kjenne skuldrene senke seg!

På laurdag måtte eg rydde i blomstrane mine. Dei hang utover alt og mista bladene. Men denne kunne ikkje kastast utan å bli dokumentert først. Tulipanar atså! Først litt blyge og tilknappa, men så byr dei på heile seg! Særleg når dei får stå i sola.

Søndag var både musikkjunior og ingeniørstudenten heime, og vi hadde felles middag og kake! Skjer ikkje kvar søndag :) Dette var ein slags restekake etter fastelavnssøndag, fylt med rosiner og mandlar og marsipan og kanel og sukker. Og naturlegvis melis på toppen!

2.søndag i advent

Igår kveld var det julebord med jobben til mannen. God mat og triveleg stemning. Men kva er det med slike lag? Her kjem eit hjartesukk frå ei med dårleg hørsel. Først stappar du masse folk, som har lyst til å snakke saman inn i eit lokale med god klang(det gjeld dei fleste slike festlokaler) så sett du på bakgrunnsmusikk, akkurat litt for lavt til at du eigentleg får med deg musikken, men akkurat nok til at det saman med stemmesurret blir uråd å høyre noko av samtalen rundt bordet. Iallfall for meg, sjøl om eg stilte med både høreapparat og Rogerpenn, og det gode øret mot folk.  Og eg trur, utfrå alle som sa meir eller mindre "hæ" at det er fleire som har problem med å høre i slike rom og samanhengar.

Eg gjekk før det vart full fart og levande musikk, så eg fekk ein times tid heime med stillheit før eg for tilbake for å hente mannen. Lell har eg sove dårleg i natt, for så mykje lyd fortsett i hodet, lenge... Jaja, det var dagens hjartesukk! Eg er mest glad i små og oversiktlege selskap, utan bakgrunnsstøy!

Sola skein på stjerna, som laga skyggebilde på stoveveggen.

Dagen idag starta med sein og lang frukost, nypressa appelsinjuice, adventste og julebrød. Tenning av to adventslys og julemusikk. Så kjente eg at eg var klar for sofaen. Kanskje sove litt til? Kanskje løse litt kryssord, steike pepperkakene eg sette deig til igår? Finns det noko betre enn sofa og laurdagsavisene ein søndag formiddag?
Mannen hadde andre planer, "sjå ut" Det er sol og snø og Så fint! Vi må ut på tur" Eg mumla noko om ."..trøtt...forkjøla...kryssord...stiv nakke", men det tolka han som "Hurra! Tur! Ski! Gjerne!" Eg mumla litt tydelegare "Sofa litt til, tur snart, sakte tur, sakte" og det høyrte han nesten. Etter at eg sa det litt høgare. Kvar gong eg bladde om kvitra han "vi må ut i sola".
Men altså, ut i kuldegrader og snø, når sofaen er mjuk og det brinn i omnen? Eg som er glad i tur var lell ikkje overbevist.  Ull over og under, ein ullgenser til, tørre klær til å ha på etter turen, ski og sko og ut i bilen. Det viste seg at det var ikkje berre vi som skulle på tur idag! Heldigvis er marka stor og skispora mange, så vi gjekk ikkje i kø, iallfall berre litt. Og når eg først var ute, var det ikkje så ille lell. Det vart tur, sol, ski. Og fine bilder! (for ei som er på snap, insta og face er jo det heilt sentralt!) Formen kom seg også, med sol og tur og lys.
Og eg tenkjer som eg ofte gjer, at eg er glad i årstider! Noko finare enn ein klar vinterdag er vanskeleg å tenkje seg, det måtte vere ein vårdag med sol og lysegrønne blad på trea, ein sommardag med solgangsbris eller ein haustdag med høg himmer og fine farger. Årstider altså!

Så ok, eg har takka for at han ikkje ga seg, men drog meg ut av sofaen og ut i marka. Kanskje er eg ikkje like motvillig neste gong.

Dagens vers, sidan det er 2.søndag i advent:

No tenner vi det andre lys
dei står der stilt og skin
Vi ventar på at Gud vår far
skal sende sonen sin 

Vekestart veke 46

Ny veke. Ny måndag. Nye oppgåver. Nye utfordringar. Heldigvis same jobb, same by, same familie.

Helga har vore full. Av biltur på snøføre, familie og feiring av både bursdag og farsdag, ein tur innom sjukehus og tur i skogen. Tid til prat. Bilturar er fine slik! Eg bekymrar meg alltid på den første turen på snø. Kjøre på snø og slaps er ikkje artig, men det gjekk bra. Å feire fødselsdag og farsdag er også bra, ein treffest og over god mat og rikeleg med kaker går praten ofte lett.
Gleda over å kome heim att til eige hus, kjøleskap og seng skal ein heller ikkje kime av! Nokon seier at det beste med å reise bort, er å kome heim att. Eg er ikkje heilt einig, for det å reise bort gir gode treff og opplevingar, men det er godt å kome heim (eg er redd det er alderen som bankar på kroppen min...)

I ettermiddag har eg fyra i vedomnen og sett på snøen dale, då er det stas! Det er så eg kjenner smaken av pepparkaker og eg får lyst å sette på julemusikk. Eg får vel vente litt til? Snøen er finare når ein ikkje skal kjøre 25 mil!

Naturen var i svart-kvitt

Haustlauv og tur i øspøs regn

Her kjennes det som å stå i hausten og sjå vinteren kome

November  

Som rennande vatn kan opne seg

midt i den isande snøflata

kan også vi stundom opne oss

for einannan:

Kaldt.

Livs-reddande.

Arne Ruset

November

Eg syns ofte november handlar om å ikkje ta jula på forskot for min del. Iår kom novemeber som julekvelden på kjerringa, eg seier litt "allereie no!?" Men det er visst allereie 7.november. Eg syns nesten det er litt kjekt at det er julepynt i butikkane... hjelp, kva har skjedd med meg? (Eg har prøvesmakt ein skumnisse også, rødme. Eg har unngått peparkaker og julebrus, det hjelp litt.) Eg har kjøpt ein faberaktig rar julepynt, og dei første julegåvene er delt ut til mottakarane.

Høg reiseaktivitet gjer vel sitt til at tida går fort? Og generelt høgt tempo. Blogging blir det iallfall ikkje av dette livet!
Idag gjekk vi tur rett etter jobb, mens det vart mørkare og mørkare. Vi fekk med oss ein nydeleg solnedgang! Slike dagar er november alright! Det er snø i marka, og eg ønskjer med kulde, slik at det frys på. Det er slitsomt med snø på gjørme, både skittent og glatt for gamle damer :)

Furet, værbitt

Det vart litt venting på laurdag, då båten skulle på land. Og rett nok er eg fin som pynt på sidelinja, men det blir litt kjedeleg i lengda, så eg gjekk meg ein tur i fjøra, langs fjorden, på ein molo.

Eg fann eit gamalt naust, trur eg iallfall. Eller var det eit lager? Iallfall lafta, og værbitt. Stødig bygd, godt handverk. Står nok godt i både ein og to stormar til.

Det låg ein gamal båt der og. Usikker på om eg vil på tur med den. Den skal ikkje ligge der særleg lenger der, om den skal kunne bli brukt på sjøen igjen. 

Sola skein, fjorden var blank og fargene sterke og klare. Oktober er så fin på sitt beste!